პოლიტიკა

მოქალაქეებმა ხმა თავისუფალ გარემოში მისცეს - NDI

ეროვნულ-დემოკრატიული ინსტიტუტი (NDI) 2016 წლის ოქტომბრის საპარლამენტო არჩევნების შესახებ შემაჯამებელ ანგარიშს აქვეყნებს. მასში ნათქვამია, რომ არჩევნები ხასიათდებოდა ღია პოლიტიკური გარემოთი, კონკურენტული საარჩევნო კამპანიით, შედეგებით, რომელიც სანდო დამკვირვებლების მონაცემებს დაემთხვა, თუმცა, არჩევნების დროს რამოდენიმე პრობლემაც გამოიკვეთა, რომელიც საარჩევნო პროცესში მიმდინარე ძალადობისა და დაშინების შემთხვევებს, ასევე, საუბნო საარჩევნო კომისიის ზოგიერთი წევრის კომპეტენციისა და ნეიტრალურობის საკითხსა და საჩივრების განხილვის მექანიზმის მიუკერძობლობის საკითხებს მოიცავს.

,,საქართველოს მოქალაქეებს თავისუფლად შეეძლოთ დაეფუძნებინათ და გაერთიანებულიყვნენ პოლიტიკურ პარტიებში. პარტიებსა და კანდიდატებს ჰქონდათ საშუალება, მონაწილეობა მიეღოთ კენჭისყრაში დაუსაბუთებელი შეზღუდვებისა და დისკრიმინაციის გარეშე. მათ აგრეთვე შეეძლოთ, ეწარმოებინათ კამპანია მთელი ქვეყნის მასშტაბით და თავისუფლად მიეტანათ მესიჯები საზოგადოებამდე, რასაც საქართველოში არსებული საკმაოდ აქტიური და პლურალისტური მედია გარემო უწყობდა ხელს. მოქალაქეებმა ხმა თავისუფალ გარემოში მისცეს. ყოველივე ზემოჩამოთვლილი მისასალმებელია. თუმცა არჩევნების დროს რამდენიმე ძირეული პრობლემაც გამოიკვეთა. მათ შორის ყველაზე მნიშვნელოვანი იყო: საარჩევნო პროცესის განმავლობაში მიმდინარე ძალადობისა და დაშინების შემთხვევები; საუბნო საარჩევნო კომისიის ზოგიერთი წევრის კვალიფიკაციის, ნეიტრალურობისა და კომპეტენციის საკითხი; და საჩივრების განხილვის მექანიზმების მიუკერძოებლობისა და თანმიმდევრობის მიმართ არსებული კითხვები“, - ნათქვამია ანგარიშში, რომელშიც ასევე აღნიშნულია, რომ არჩევნებმა საარჩევნო კანონმდებლობასთან და ადმინისტრაციული რესურსის არასათანადო გამოყენებასთან დაკავშირებული ხარვეზებიც გამოავლინა.

მარი ნამგალაძე