სამართალი

მოქალაქე, რომელიც პატრულს ძალადობასა და მუქარაში ადანაშაულებს, პროკურატურაში დაკითხვაზე იმყოფება

მოქალაქე გიორგი პერტაია, რომელიც პატრულის თანამშრომლებს ფიზიკურ და სიტყვიერ შეურაცხყოფაში ადანაშაულებს, ასევე ნარკოტიკის ჩადებისა და მეუღლის გაუპატიურების მუქარაში, თბილისის პროკურატურაში ჩვენებას აძლევს.

მომხდართან დაკავშირებით მან გუშინ პრესკონფერენცია გამართა. პერტაიას ნაამბობიდან გაირკვა, რომ პატრულმა 27 ნოემბერს გააჩერა ნიკოლაძის ქუჩაზე.

როგორც პერტაიამ რუსთავი 2-ს განუცხადა, მას საგამოძიებო უწყებიდან დღეს დაუკავშირდნენ.

„მომხდარიდან შემდეგ დღეს მივმართე. პირველად ახლა დამიკავშირდნენ“, -თქვა პერტაიამ დაკითხვის წინ.

პერტაისთან ერთად პროკურატურაში მივიდა მისი უფლებადამცველი, არასამთავრობო ორგანიზაცია „კონსტიტუციის 42-ე მუხლის“ წარმომადგენელი დიმიტრი ხაჩიძე. მისი ინფორმაციით, უწყება საქმის ფაქტობრივი დეტალების დაზუსტებას აპირებს.

„დღეს დაგვიკავშირდნენ, რომელი საათისთვის მოვსულიყავით ჩვენების მისაცემად იმ ფაქტობრივ გარემოებებთან დაკავშირებით, თუ როგორ განვითარდა მოვლენები. გამოვცხადდით, მივცემთ ჩვენებას და შემდგომ ვნახავთ, რას მოიმოქმედებს გამოძიება და როგორ წარიმართება. იმედს ვიტოვებთ, რომ იქნება ობიექტური და ეფექტური“, -თქვა ხაჩიძემ.

ანა მებურიშვილი