სამართალი

მოკლული გიორგი შენგელიას მამა დამოუკიდებელი ექსპერტიზის ჩატარებას გეგმავს

კრწანისის საწვრთნელ ბაზაზე მოკლული გიორგი შენგელიას მამა გამოძიებას არ ენდობა და დამოუკიდებელი ექსპერტიზის ჩატარებას გეგმავს.

როგორც რომან შენგელიამ ჟურნალისტებთან საუბარში განაცხადა, გამოძიება ცდილობს მკვლელობა მის მეორე შვილს დააბრალონ, რომელიც კრწანისის საწვრთნელ ცენტრში მსახურობდა.

მისივე თქმით, იმ შემთხვევაში, თუ გამოძიება ეფექტიანად არ წარიმართება, საპროტესტო აქციებს დაიწყებს.

,,ექსპერტიზა აუცილებლად უნდა იყოს, ოღონდ ჩვენი, მათი არა. დამოუკიდებელი ექსპერიზა უნდა ჩატარდეს აუცილებლად.

აგერ გვისვენია ერთი და მეორის დასვნებას აქ მე არ ვაპირებ. გამოძიება უნდა ჩაატარონ, როგორც საჭიროა, ისე და არა ისე, როგორც თვითონ უნდათ’’, - ამბობს მოკლულის მამა.

ცნობისათვის: ცენტრ ”კრწანისის” ტერიტორიაზე უცხო პირების შეჭრის მცდელობას ჰქონდა ადგილი. თავდაცვის სამინისტროს ინფორმაციით, ისინი არ დაემორჩილნენ განწესში მყოფი გუშაგის სიტყვიერ გაფრთხილებას და თავს დაესხნენ მას, რის შემდეგაც გუშაგმა წესდებით გათვალისწინებული მოქმედებები განახორციელა და ცენტრის ტერიტორიაზე შეჭრის ფაქტი აღკვეთა. თავდაცვის სამინისტროს სამხედრო პოლიციის დეპარტამენტის თანამშრომლებმა, ცენტრის მიმდებარე ტერიტორიის დათვალიერებისას, ერთ-ერთი თავდამსხმელის ცხედარი აღმოაჩინეს. ის უკვე იდენტიფიცირებულია. გარდაცვლილი 1993 წელს დაბადებული, ზუგდიდელი გიორგი შენგელიაა. ეძებენ კიდევ ორ პირს, რომელმაც გაქცევა მოახერხა.

საქმეს მთავარი პროკურატურის ზედამხედველობით, თავდაცვის სამინისტროს სამხედრო პოლიციის დეპარტამენტი იძიებს. გამოძიება სსკ-ის 116-ე მუხლის I ნაწილით მიმდინარეობს.

ამასთან, როგორც ლევან იზორიამ ტელეკომპანია ”იმედს” განუცხადა, მოკლული გიორგი შენგელიას ძმა აღნიშნულ სამხდერო ბაზაზე მსხაურობდა მიმდინარე წლის 15 სექტმებრამდე. მისი თქმით გამოძიებას, ბუნებრივია, აქვს გარკვეული კითხვები ძმასთან.

,,გამოძიების ინტერესებიდან გამომდინარე, მიზანშეწონილი იქნება გამოკითხვის წარმოება ძმასთანაც, თუმცა მისი ადგილმდებარეობის დადგენა ამ ეტაპამდე შეუძლებელი გახდა. შესაბამისად, როდესაც მის ადგილმდებარეობას საგამოძიებო ორგანოები დაადგენენ, ეს გამოკითხვაც ჩატარდება,’’ - განაცხადა იზორიამ.

ნინო ექვთიმიშვილი