პოლიტიკა

„მოხსნას თავისი კანდიდატურა სალომე ზურაბიშვილმა“ - შესაბამისი მოთხოვნით პეტიცია გავრცელდა

მოქალაქეთა ნაწილი საპრეზიდენტო კანდიდატის, სალომე ზურაბიშვილის მიერ კანდიდატურის მოხსნას ითხოვენ. პეტიცია შესაბამისი მოთხოვნით საიტ change.org-ზეა განთავსებულია და ამ დროისთვის მას ხელი 501-მა ადამიანმა მოაწერა.

პეტიციის ტექსტში განმარტებულია, რომ სალომე ზურაბიშვილი ანტისახელმწიფოებრივ პოლიტიკას ატარებს, ხოლო მისი განცხადებები რუსულ ნარატივს შეესაბამება.

„მოვითხოვთ მმართველი გუნდისგან, რომლის საპრეზიდენტო კანდიდატია ქ-ნი სალომე ზურაბიშვილი და ასევე, თავად ქალბატონი სალომე ზურაბიშვილისგან - დაუყოვნებლივ მოხსნას მისი კანდიდატურა 2018 წლის საპრეზიდენტო არჩევნებიდან. მიგვაჩნია, რომ ქალბატონი სალომე ზურაბიშვილი წინასაარჩევნო კამპანიის პერიოდში ღიად და დაუფარავად ატარებდა და ატარებს ანტისახელმწიფოებრივ პოლიტიკას, რომელიც ვნებს ქვეყნის დეკლარირებულ დასავლურ კურსს და ღირებულებებს. მიგვაჩნია, რომ ადამიანი, რომელიც ავრცელებდა და ავრცელებს საქართველოს ოკუპანტი ქვეყნის, რუსეთის, კერძოდ კრემლის ნარატივს და გზავნილებს, ვერ შეასრულებს ქვეყნისა და საზოგადოების წინაშე ნაკისრ პასუხისმგებლობას და ვერ იქნება ქვეყნის დამოუკიდებლობის, მისი ტერიტორიული მთლიანობის შენარჩუნებისა და განვითარების გარანტი“, - წერია პეტიციაში.

ცნობისთვის, 2 დღის წინ ზურაბიშვილმა განაცხადა, რომ ქართულმა მხარემ დაბომბა საკუთარი მოსახლეობა ცხინვალში.