სამართალი

მოხდება სასამართლო სისტემის სრული „მურუსიზაცია“ და “ჩინჩალაძიზაცია” - ზაზა ხატიაშვილი

ადვოკატთა ასოციაციის თავმჯდომარის, ზაზა ხატიაშვილის განცხადებით, თუ იუსტიციის უმაღლესი საბჭო, სააპელაციო სასამართლოს თავმჯდომარედ ლევან მურუსიძეს, ან მიხეილ ჩინჩალაძეს აირჩევს, მაშინ სასამართლოს სისტემის სრული „მურუსიზაცია“, ან „ჩინჩალიზაცია“ მოხდება.

ამის შესახებ ხატიაშვილმა მედიას იუსტიციის უმაღლეს საბჭოსთან განუცხადა, სადაც არასამთავრობო ორგანიზაციების საბჭოს სხდომას აპროტესტებენ, რომელზეც, სავარაუდოდ, სააპელაციო სასამართლოს თავმჯდომარე უნდა იყოს არჩეული.

„საბჭოსგან არანაირი წესიერი გადაწყვეტილების მოლოდინი არ მაქვს. მოხდება სასამართლო სისტემის სრული „მურუსიზაცია“ და “ჩინჩალაძიზაცია”. სასამართლო სისტემა როცა ხელისუფლებას დაჭირდება, გადავა ხელისუფლების ჯიბეში. ეს არის ერთ-ერთი ყველაზე უბინძურესი გადაწყვეტილება, რომ ჩინჩალაძე, რომელიც ჩემი შეფასებით, ხელისუფლების შეცვლის შემდეგ ციხეში უნდა მჯდარიყო, იღებს გარანტიებს და ალბათ გახდება სააპელაციო სასამართლოს თავმჯდომარე“,-განაცხადა ზაზა ხატიაშვილმა.

სააპელაციო სასამართლოს თავმჯდომარემ ვალერი ცერცვაძემ, თანამდებობა, პირადი სურვილის საფუძველზ,ე რამდენიმე დღის წინ დატოვა.

არაოფიციალური ინფორმაციით, იუსტიციის უმაღლესი საბჭო, თანამდებობაზე ლევან მურუსიძის , ან მიხეილ ჩინჩალაძის კანდიდატურებს განიხილავს.

მონიკა დავლიანიძე