სამართალი

მოხდა ინციდენტი, რომლისგანაც არავინაა დაზღვეული - რუსთავი 2-ის გადამღებ ჯგუფზე თავდასხმაში ბრალდებულების ადვოკატი

რუსთავი 2-ის გადამღებ ჯგუფზე თავდასხმაში ბრალდებული ჩინური კომპანიის წარმომადგენლებს სასამართლო აღკვეთის ღონისძიებას დღეს შეუფარდებს. სასამართლო სხდომის დაწყებამდე ჩინეთის მოქალაქეებს საელჩოს წარმომადგენლები შეხვდნენ.

როგორც ჟურნალისტებს ბრალდებულების ადვოკატმა, ოლეგ გრძელიძემ განუცხადა, ჩინეთის მოქალაქეები ბრალს აღიარებენ და აცხადებენ, რომ მათსა და რუსთავი 2-ის გადამღებ ჯგუფს შორის დაპირისპირება ენის ბარიერმა გამოიწვია.

დაცვის ხმარე ბრალდებულების გირაოს სანაცვლოდ გათავისუფლებას ითხოვს.

„ისინი შეცდნენ და ინანიებენ. მოხდა ინციდენტი, რომლისგანაც არავინაა დაზღვეული. ისინი ლაპარაკობდნენ ჩინურად, ჩვენები ქართულად, ვერ გაიგეს, ისინი ეუბნებოდნენ, რომ ტერიტორია დაეტოვებინათ და მოხდა ინციდენტი. ისეთი სერიოზული რამ, რომ სპეციალურად ვინმეს გაეკეთებინა, ან ვინმეს მიმართ ინტერესი ჰქონოდა, ასეთი არაფერი ყოფილა,“ - აცხადებს ადვოკატი.

შეგახსენებთ, რომ რუსთავი2-ის ჟურნალისტს, ეკა გაგუას და ოპერატორ ლევან კალანდიას ჩინური კომპანიის თანამშრომლებმა ფიზიკური შეურაცხყოფა იმ დროს მიაყენეს, როცა ,,კურიერის" გადამღები ჯგუფი სიუჟეტს სარკინიგზო ხაზის მშენებლობის დროს გამოვლენილ დარღვევებზე ამზადებდა.