პოლიტიკა

მოდით, ყველა იმ ადამიანმა, ვინც გუნდურობას მასწავლის, თქვას, დაუჭერენ თუ არა მხარს მოსამართლეთა 10-კაციან სიას - ეკა ბესელია

იურიდიულ საკითხთა საპარლამენტო კომიტეტის ყოფილი თავმჯდომარის, ეკია ბესელიას განცხადებით, იმ ადამიანებმა, ვინც მას გუნდურობას ასწავლის, საჯაროდ უნდა თქვან, დაუჭერენ თუ არა იუსტიციის უმაღლესი საბჭოს მიერ წარდგენილ სიას მხარს. როგორც მან ჟურნალისტებს უთხრა, ამით გამოჩნდება მათი პოზიცია, ვინც დღეს ირაკლი კობახიძის მიერ მოფიქრებულ ვერსიას ავითარებს.

„რა დავალებით ისაუბრებს კახა კუჭავა, მდინარაძე ან რომელიმე სხვა კოლეგა, ეს გასაგებია, რომ არის იმ ჯგუფის პოზიცია, რომელსაც არ გამოუხატავს თავისი პროტესტი და წინააღმდეგობრივი დამოკიდებულება ამ პროცესისა და ამ სიის მიმართ. ამიტომ მოდით, ყველამ სათითაოდ დააფიქსიროს თავისი პოზიცია ღიად და საჯაროდ, რას ფიქრობს ამ სიასთან დაკავშირებით - უნდა იყოს თუ არა ეს სია გაწვეული და დაუჭერენ თუ არა მას მხარს. მოდით, ყველა ის ადამიანი, ვინც გუნდურობას მასწავლის, რაღაც ვერსიებს ავითარებს და ჩემ ნაცვლად საუბრობს მიზეზებზე, უმჯობესია, პირდაპირ მათ ჰკითხოთ, დაუჭერენ თუ არა იმ ადამიანებს მხარს, რომლებიც ამ სიაში არიან. გამოჩნდება მათი პოზიცია, ვინც დღეს საჯაროდ ავითარებს იმ ვერსიას, რაც მოიფიქრა ირაკლი კობახიძემ. ეს არის ცრუ ვერსია“, - განაცხადა ბესელიამ.