სამართალი

მნიშვნელოვანია,რომ სტრასბურგის სასამართლოში წარსადგენი მოსამართლეების კონკურსი რამდენიმე პრინციპს ითვალისწინებდეს - ანა დოლიძე

პრეზიდენტის საპარლამენტო მდივნის, ანა დოლიძის განცხადებით, ძალიან მნიშვნელოვანია, რომ სტრასბურგის სასამართლოში წარსადგენი მოსამართლეების შესარჩევი კონკურსი ითვალისიწნებდეს ევროსაბჭოს რამდენიმე პრინციპს.

როგორც დოლიძემ საკითხის კომენტირებისას აღნიშნა, ესენია პროცესის საჯაროობა; სამართლიანი პროცესი ყველას მიმართ; პროცესი უნდა იყოს არადისკრიმინაციული.

„ძალიან მნიშვნელოვანია, რომ შერჩევის პროცესი ითვალისწინებდეს რამდენიმე პრინციპს, რომელიც მოდის ისევ ევროსაბჭოდან: პროცესის საჯაროობა, ის რომ პროცესი იყოს სამართლიანი ყველას მიმართ, ის რომ პროცესი იყოს არადისკრიმინაციული რომელიმე კონკრეტული პიროვნების მიმართ. მნიშვნელოვანია, ჩვენ ვისწავლოთ იმ გაკვეთილისგან, რომელიც ჩვენ მივიღეთ წინა შერჩევის პროცესის დროს“,-აღნიშნა ანა დოლიძემ.

გუშინ, იუსტიციის სამინისტრომ ადამიანის უფლებათა ევროპულ სასამართლოში, საქართველოდან მოსამართლის კანდიდატურების შესარჩევად კონკურსი კვლავ გამოაცხადა.

იუსტიციის სამინისტროს ინფორმაციით, კონკურსში მონაწილეობის მიღება შეუძლიათ 30 წლიდან 65 წლამდე ასაკის საქართველოს ქმედუნარიან მოქალაქეებს, რომლებიც სრულყოფილად ფლობენ საქართველოს სახელმწიფო ენას; ევროპის საბჭოს ერთ-ერთ ოფიციალურ ენას ინგლისურს ან ფრანგულს; ადამიანის უფლებათა ევროპულ კონვენციას, შესაბამის პრეცედენტულ სამართალს და აქვთ ამ სფეროში მუშაობის გამოცდილება; საერთაშორისო საჯარო სამართლის პრინციპებსა და საქართველოს კანონმდებლობას.

კანდიდატი უნდა აკმაყოფილებდეს მაღალი სამოსამართლო თანამდებობის დასაკავებლად საქართველოს კანონმდებლობით დადგენილ მოთხოვნებს ან უნდა იყოს კომპეტენტური და აღიარებული სამართალმცოდნე; ჰქონდეს პროფესიით მუშაობის არანაკლებ ხუთწლიანი გამოცდილება და მაღალი მორალური და პროფესიული რეპუტაცია.

საბუთებისა და განაცხადების მიღება 2017 წლის 14 მარტამდე გაგრძელდება.

მონიკა დავლიანიძე