პოლიტიკა

მმართველი გუნდი არ უჭერს მხარს ნარკოტიკის მოხმარების ლეგალიზებას - თეა წულუკიანი

იუსტიციის მინისტრის, თეა წულუკიანის განცხადებით, მმართველი გუნდი არ უჭერს მხარს ნარკოტიკული საშუალებების მოხმარების ლეგალიზებას.

„საქართველოში ის გუნდი, რომლიც მართავს ქვეყანას, არ უჭერს მხარს იმას, რომ ნარკოტიკის მოხმარების ლეგალიზება, ანუ დაკანონება მოხდეს.

როგორი მძიმე რეაქციაც არ უნდა იყოს იმაზე, არა, ბატონებო – კოკაინი, ჰეროინი და სხვა, ძალიან დიდია სია, ეს სია იზრდება ყოველდღე, ახალ გამოგონებებს გვთავაზობენ ნარკორეალიზატორები და მისი შემქმნელები, ვერ იქნება კანონიერი მოხმარება“, – თქვა მინისტრმა.

წულუკიანმა აღნიშნა, რომ გაითვალისწინებენ საკონსტიტუციო სასამართლოს გადაწყვეტილებას მარიხუანის მოხმარების დეკრიმინალიზაციასთან დაკავშირებით.

„რაც შეეხება საკონსტიტუციო სასამართლოს გადაწყვეტილებებს, ჩვენ ვალდებულნი ვართ, ისინი მივიღოთ მხედველობაში, სხვანაირად უბრალოდ ვერ იქნება. რაც შეეხება დეკრიმინალიზაციას, ეს ნიშნავს იმას, რომ მომხმარებლისთვის მოხმარებაზე არ იყოს ციხე. ეს იყო, არის და იქნება ჩემი მიდგომა 2013 წლიდან. უბრალოდ, თუ ჩვენ გავაგრძელებთ ისე მსჯელობას, როგორც აკეთებდა რამდენიმე ადამიანი, შევალთ ისევ ჩიხში. კერძოდ, როდესაც ჩვენ ვსაუბრობთ, რომ მომხმარებელს სჭირდება ზრუნვა და ვინც არ არის მომხმარებელი, სჭირდება დაცვა. იმ სამუშაო ჯგუფში თუ ვიქნებით წარმოდგენილი, ამ პოზიციას აუცილებლად დავიცავ“, – თქვა იუსტიციის მინისტრმა.