პოლიტიკა

მხოლოდ სრულ იდიოტებსა და დებილებს შეუძლიათ თქმა, რომ 2008 წელს საქართველომ ომი დაიწყო - მიხეილ სააკაშვილი

საქართველოს ყოფილი პრეზიდენტის, მიხეილ სააკაშვილის განცხადებით, 2008 წლის აგვისტოში რუსეთის აგრესიის მიზანი იყო მთავრობის შეცვლა და საქართველოს, როგორც სახელმწიფოს გაუქმება. ამის შესახებ სააკაშვილმა „Настоящее время“-სთან ინტერვიუში თქვა, რომელიც ეხებოდა აგვისტოს ომის მე-10 წლისთავს.

„რუსული შემოჭრის მიზანი იყო არა მხოლოდ თავდასხმა საქართველოზე, როგორც ქვეყანაზე, არამედ საქართველოს სახელმწიფოებრიობაზე, რადგან ქართული სახელმწიფოებრიობა მაშინ პრობლემებს ქმნიდა წარმატებული რეფორმების სახით და ა.შ.. და მაშინ მიზანი იყო თბილისის აღება, მთავრობის შეცვლა და საქართველოს, როგორც სახელმწიფოს გაუქმება“, -აღნიშნა სააკაშვილმა.

სააკაშვილი გაღიზიანდა, როცა ჟურნალისტმა დაუსვა კითხვა, ვინ დაიწყო ომი 2008 წელს.

„რას ნიშნავს; ვინ დაიწყო პირველმა? მხოლოდ სრულ იდიოტებსა და დებილებს შეუძლიათ თქმა, რომ საქართველომ დაიწყო [ომი]. სრულ იდიოტებსა და დებილებს. სინამდვილეში ეს ამორალურია, რადგან არსებობს უამრავი მასალა“, - თქვა სააკაშვილმა.

საქართველოს ყოფილი პრეზიდენტის განცხადებით, საქართველოს მთავარი „ბრძოლისუნარიანი ბრიგადა“ ომის მომენტში ერაყში იმყოფებოდა.

„ჩვენ რომ მოგვენდომებინა რაღაცის დაწყება, ჩვენ ნებისმიერ მომენტში შეგვეძლო მისი [სამხედრო ბრიგადის] ჩამოყვანა, იყო ასეთი შეთანხმება ამერიკელებთან. მაგრამ არ ჩამოვიყვანეთ“, -თქვა სააკაშვილმა.