პოლიტიკა

მხოლოდ დედაქალაქის ბიუჯეტი ვერ გაწვდება იმ დიდ და მნიშვნელოვან პროექტებს, რომლის განხორციელებასაც ვგეგმავთ - კახა კალაძე

თბილისის მერი კახა კალაძე დედაქალაქის მოსახლეობას დაპირდა, რომ მომავალ წელს მერია წლევანდელზე მეტ პროექტს განახორციელებს.

„ბიუჯეტი იმაზე ნაკლები არ იქნება, რაც წელს იყო. შემიძლია დაგპირდეთ, რომ იქნება იმაზე მეტი ვიდრე, იყო წელს და განვახორციელებთ იმაზე მეტ პროექტს, ვიდრე განხორციელდა წელს“, -თქვა კალაძემ.

კალაძის ცნობით, პროექტები სხვადასხვა მიმართულებით განხორციელდება, ესაა ინფრასტრუქტურა, კეთილმოწყობა, ეკოლოგია, გამწვანება, ნარჩენების მართვა, საზოგადოებრივი ტრანსპორტის მოწესრიგება.

„2019 წლის ბოლოს მთლიანად ჩანაცვლებული იქნება არსებული ყვითელი ავტობუსების პარკი, მოწესრიგდება მეტრო, დაემატება ახალი შემადგენლობები. ყველაფერი მიმართული იქნება, რომ თბილისში ცხოვრება იყოს კომფორტული, ქალაქი კეთილმოწყობილი და ლამაზი. ჩვენთვის ჯანსაღი წესის დანერგვა, პრიორიტეტულია მულტიფუნქციური ცენტრების მშენებლობა. ყველა მიმართულებით ვმუშაობთ. ის დიდი და მნიშვნელოვანი პროექტები, რომლის განხორციელებასაც ვგეგმავთ, ამას მხოლოდ დედაქალაქის ბიუჯეტი ვერ გაწვდება და ცენტრალური ბიუჯეტიდან სპეციალური ტრანსფერები გამოიყოფა“, – განაცხადა კალაძემ.