პოლიტიკა

მხარს დავუჭერდი ფემიციდის შესახებ „ქალთა მოძრაობის“ პეტიციის განხილვას - ეკა ბესელია

იურიდიულ საკითხთა საპარლამენტო კომიტეტის თავმჯდომარის, ეკა ბესელიას განცხადებით, ის ფემიციდზე „ქალთა მოძრაობის“ მიერ მომზადებული პეტიციის განხილვას მხარს უჭერს.

კომიტეტი დღევანდელ სხდომაზე იმსჯელებს, დაიწყოს თუ არა პეტიციის განხილვა.

„ჩემი პირადი მოსაზრებით, იმდენად პრობლემური საკითხია, რომ საჭირო იქნება სიღმისეულ კვლევაში შესვლა. პეტიციის განხილვასა და ამ საკითხის უკვე სიღრმისეულად მომზადებას მხარს დავუჭერდი. ეს იქნება დამამძიმებელი გარემოება თუ სხვა ტიპის ფორმულირება, ამაზე სპეციალისტებთან ერთად ვიმსჯელებთ“, – აღნიშნა დეპუტატმა.

პეტიციაში აღნიშნულია, რომ საქართველოს პარლამენტმა „სისხლის სამართლის კოდექსში“ ფემიციდის აკრძალვის შესახებ სპეციალური მუხლი უნდა მიიღოს ან გამოყოს გენდერულად მოტივირებული მკვლელობა დამამძიმებელ გარემოებად და განსაზღვროს ამ დანაშაულისთვის 13-20 წლამდე თავისუფლების აღკვეთა, სხვა დამამძიმებელი გარემოების არსებობის შემთხვევაში კი, უვადო პატიმრობა დააწესოს. დოკუემენტს 1000 ხელმოწერა აქვს.