პოლიტიკა

მივმართოთ ევროპარლამენტს, რათა ტატუნაშვილი-ოთხოზორიას სიაში მოხვედრილი პირები მათ შავ სიებშიც მოხვდნენ - სერგი კაპანაძე

ოპოზიცია მოუწოდებს მმართველ გუნდს, ქმედითი ნაბიჯები გადადგას ტატუნაშვილი-ოთხოზორიას სიის ეფექტური მუშაობისთვის. „ევროპული საქართველოს“ ერთ-ერთმა ლიდერმა, სერგი კაპანაძემ პარლამენტის პლენარულ სხდომაზე შესთავაზა მთავრობას, რომ საოკუპაციო ძალების მიერ ყოველი საქართველოს მოქალაქის გატაცებაზე აღძრული იყო სისხლის სამართლის საქმე, რათა გამოიკვეთოს კონკრეტული პირების ბრალეულობა.

„ერთობლივი წერილით მივმართოთ ევროპარლამენტს და ზოგადად გავაათკეცოთ მუშაობა იმ კუთხით, რომ ამ სიაში მოხვედრილი ადამიანები იყვნენ შეყვანილი ჩვენი პარტნიორების შავ სიებში. დღეს სუს-მა გამოაქვეყნა ანგარიში რომელშიც თქვა, რომ 178 ადამიანი იყო გატაცებული საოკუპაციო ხაზიდან. შემდეგი ნაბიჯი მთავრობის მხრიდან უნდა იყოს, რომ ყოველი ასეთი საქმის შესახებ იყოს საქმე აღძრული, რათა კონკრეტული ადამიანების ბრალეულობა იყოს გამოკვეთილი. მარტო ამ შემთხვევაში ექნება ეფექტი ამ სიას, რომელიც მიიღო პარლამენტმა“, -თქვა კაპანაძემ.

ნობისთვის, 21 მარტის პლენარულ სხდომაზე საქართველოს პარლამენტმა 106 ხმით მიიღო რეზოლუცია „რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და „ოთხოზორია-ტატუნაშვილის სიის“ შესახებ“. დოკუმენტის მიხედვით, საქართველო არჩილ ტატუნაშვილის მკვლელობაში სრულ პასუხისმგებლობას რუსეთს აკისრებს და მოითხოვს საერთაშორისო თანამეგობრობისგან, მიიღოს ზომები, რათა ქართულ მხარეს მის უცხოელ პარტნიორებთან ერთად საფუძვლიანი გამოძიების ჩატარებას უფლება მისცენ.

გარდა ამისა, აღნიშნული რეზოლუციით საქართველოს მთავრობას ევალება, 2018 წლის 15 ივნისამდე პარლამენტს წარუდგინოს ოკუპირებულ ტერიტორიაზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში ბრალდებულ და მსჯავრდებულ პირთა სია, რომელსაც „ოთხოზორია-ტატუნაშვილის“ სია ეწოდება.