პოლიტიკა

მიწის ნაკვეთების გასხვისება უცხოელებზე შეჩერებულია, საკითხს წინასაარჩევნო კამპანიისთვის იყენებენ- გურამ მაჭარაშვილი

პარლამენტის საპროცედურო საკითხთა კომიტეტის თავმჯდომარის მოადგილის, გურამ მაჭარაშვილის თქმით, შეჩერებულია მიწის ნაკვეთების გასხვისება უცხოელებზე და იმ კომპანიებზე, რომელთა დამფუძნებლები არიან უცხო ქვეყნის მოქალაქეები.

როგორც მაჭარაშვილმა პრესკონფერენციაზე აღნიშნა, ადამიანები არ უშვებენ ხელიდან შანს, რომ ნებისმიერი საკითხი წინასაარჩევნო კამპანიად აქციონ.

„ადამიანები არ უშვებენ შანს ხელიდან, რომ ნებისმიერი აქტუალური თემა აქციონ იმ საკითხად, რასაც ქვია წინასაარჩევნო კამპანია. მორატორიუმთან დაკავშირებითაც არაფერი არ შეცვლილა, შეჩერებულია მიწის ნაკვეთების გასხვისება უცხოელებზე და იმ კომპანიებზე რომლების დამფუძნებლები არიან უცხო ქვეყნის მოქალაქეები.

ერთადერთი, რაც მოხდა ისევ და ისევ საქართველოს მოქალაქეებისთვის და ჩვენი საზოგადოების სასარგებლოდ, რომ კომერციულ ბანკებს, რომელთა დამფუძნებლები არიან უცხოელები მიცემოდათ შესაძლებლოიბა, რომ იპოთეკით დაეტვირთათ მიწის ნაკვეთები, სასოფლო-სამეურნეო დანიშნულების მიწის ნაკვეთები, თუნდაც იმიტომ, რომ ჩვენი საზოგადოების გარკვეულ ნაწილს, რომელსაც საკუთრებაში აქვს სასოფლო-სამეურნეო დანიშნულების მიწის ნაკვეთი მისცემოდათ შესაძლებლობა კრედიტის აღების და კომერციული საქმიანობა განევითარებინათ. სწორედ ამიტომ მოხდა ეს ორწლიანი დათქმა, რომ კომერციულ ბანკებს ორი წლის განმავლობაში შეუძლიათ გაასხვისონ მიწის ნაკვეთი საქართველოს მოქალაქეზე”,- განმარტა გურამ მაჭარაშვილმა.

მონიკა დავლიანიძე