პოლიტიკა

„მინი-სტრასბურგის“ მოდელის შექმნამ, შეიძლება, დუბლირების პრობლემა გამოიწვიოს - ეკა ბესელია

პარლამენტის იურიდიულ საკითხთა კომიტეტის თავმჯდომარის, ეკა ბესელიას განცხადებით, საკონსტიტუციო სასამართლოს ბაზაზე ადგილობრივი „სტრასბურგის“ მოდელის შექმნის ინიციატივა, რომელიც საკონსტიტუციო კომისიაშია წარდგენილი, ფუნქციების დუბლირების პრობლემას გამოიწვევს, რადგან საერთო სასამართლოების გადაწყვეტილებების გადახედვის შესაძლებლობა უზენაეს სასამართლოს აქვს.

„საკონსტიტუციო სასამართლოს აქვს უნივერსალური ფუნქცია კონსტიტუციური მართლმსაჯულების განხორციელებისა და ის, რომ მას დამატებით შესძინოს ის ფუნქციები, რომ კანონიერ ძალაში შესული გადაწყვეტილებების გადახედვა დაიწყოს, ანუ ერთგვარი მინი-მოდელი შეიქმნას სტრასბურგის სასამართლოსი, ასეთი მარტივი თემა არ არის. ერთგვარად შეიძლება დუბლირების პრობლემაც გაჩნდეს, იმიტომ რომ კანონიერ ძალაში შესული გადაწყვეტილებების გადასინჯვის საგამონაკლისო წესი ისედაც არსებობს. ჩვენ დავამატეთ ამ გამონაკლის წესებს კიდევ რამდენიმე პუნქტი და ამას დღეს ახორციელებს უზენაესი სასამართლო. თუ ამ ფუნქციის პარალელურ ფუნქციას ვაძლევთ საკონსტიტუციო სასამართლოს, ამას ძალიან ღრმა ანალიზი სჭირდება. მე მგონია, ცოტა ნაჩქარევია ეს პოზიცია, ნაჩქარევია ჯერ ამ გადაწყვეტილების მიღებაზე ფიქრი იქამდე, ვიდრე არ მოხდება ამის აუცილებლობის ღრმა ანალიზი“, - გამოეხმაურა ინიციატივას ბესელია.

უმრავლესობის წევრის თქმით, ამ მოდელის შემოტანას სასამართლოში დასჭირდება დამატებითი ადამიანური, საკადრო და ფინანსური რესურსები.

საკონსტიტუციო კომისიის დღევანდელ სხდომაზე ერთ-ერთი წარდგენილი ინიციატივის მიხედვით, საკონსტიტუციო სასამართლოს დაემატება „მინი-სტრასბურგის“ ფუნქცია, რომელიც მისცემს მას საშუალებას, გადახედოს საერთო სასამართლოების მიერ მიღებულ გადაწყვეტილებებს.

შეგახსენებთ, რომ დღეს საკონსტიტუციო კომისიაში განიხილავენ სასამართლო ხელისუფლების ფორმირების საკითხს, კერძოდ, რა კრიტერიუმს უნდა აკმაყოფილებდეს და როგორ უნდა დაინიშნოს მოსამართლე. გარდა ამისა, იმსჯელებენ ომბუდსმენის არჩევის წესზე.

ანა მებურიშვილი