პოლიტიკა

მინდა გავაწბილო ყველა ის ადამიანი, ვინც ჩემს გადადგომას ელოდა - პრემიერი

საქართველოს პრემიერ-მინისტრის, გიორგი კვირიკაშვილის განცხადებით, მან შეისწავლა ჯანდაცვის სამინისტროს ის ტენდერი, რომლის სავარაუდო ხარვეზებზე საუბრობდა ბიზნესმენი გიორგი გაჩეჩილაძე (იგივე მომღერალი „უცნობი“).

პრემიერის თქმით, დოკუმენტების შესწავლის შედეგად გაირკვა, რომ ტენდერი კანონიერად ჩატარდა. კვირიკაშვილმა აღნიშნა, რომ გიორგი გაჩეჩილაძის შეფასებები მისი და სამთავრობო გუნდის წევრების მიმართ შეურაცხმყოფელი აღმოჩნდა.

„როდესაც გია გაჩეჩილაძემ მე მომმართა, ბუნებრივია, ურთიერთობიდან გამომდინარე მისი გზავნილი მივიღე. მაშინვე ერთადერთი დავალება მივეცი ჩემი ადმინისტრაციის ხელმძღვანელს, რომ გარკვეულიყო დეტალებში - იყო თუ არა დაცული კონკურენტული გარემო, პირობები და თანაბარი შესაძლებლობების პირობები. მან მოიკითხა და მისგან მივიღე ამომწურავი პასუხი ამ საკითხთან დაკავშირებით. მე დავასკვენი, რომ აბსოლუტურად გამჭვირვალედ, კანონის დაცვით იყო ჩატარებული ტენდერი და რომ არ გაეკეთებინა გია გაჩეჩილაძეს ჩემი და ჩემი გუნდის წევრების მისამართით შეურაცხმყოფელი განცხადებები, საერთოდ არ ვაპირებდი არანაირი კომენტარის გაკეთებას ამ თემაზე. მინდა დავამკვიდროთ სტანდარტი, რომ არ შეიძლება ადამიანების ასე მოხსენიება, როგორც ეს გააკეთა გია გაჩეჩილაძემ“, -თქვა პრემიერმა პარლამენტში გამოსვლისას.

კვირიკაშვილმა აღნიშნა, რომ ამ საკითხს მოჰყვა ხმები მისი სავარაუდო გადადგომის შესახებ.

„ამას მოჰყვა პოლიტიკური ქარიშხალი - არიქა, გადადგება, გადმოდგება და ასე შემდეგ. მინდა, გავაწბილო ყველა ის ადამიანი, ვინც ასეთ მოლოდინებს ტირაჟირებს. მე იმის გამო გავაკეთე განცხადება გადადგომაზე, თუ კანონი დაირღვეოდა“, -თქვა პრემიერმა.

12 დეკემბერს გიორგი გაჩეჩილაძემ ისაუბრა ტენდერებში კომპანიების მონაწილეობასთან დაკავშირებულ ხარვეზებზე. მისი ინფორმაციით, „სიტროინ ჯორჯიამ“ უსაფუძვლოდ წააგო ჯანდაცვის სამინისტროს მიერ სასწრაფო სამედიცინო დახმარების ავტომობილების ტენდერი.

მან ასევე განაცხადა, რომ ტენდერებს მთავრობის წევრებთან შეკრული კომპანიები იგებენ.

გაჩეჩილაძემ განაცხადა, რომ ამ საკითხზე სალაპარაკოდ პრემიერ-მინისტრთან მივიდა, თუმცა გიორგი კვირიკაშვილის მაგივრად მას პრემიერის თანაშემწე შეხვდა, რომელმაც სასამართლოში მიმართვა ურჩია.

გაჩეჩილაძის განცხადებებზე საპასუხოდ პრემიერ-მინისტრმა განაცხადა, რომ მთავრობის წევრთა კორუფციულ გარიგებებში მონაწილეობის დადასტურების შემთხვევაში ის პოსტს დატოვებს.

ანა მებურიშვილი