პოლიტიკა

მიმდინარეობს მიზანმიმართული შეტევა შეწყალების პროცესისა და შეწყალების იდეის წინააღმდეგ - ზვიად ქორიძე

ინფორმაცია იმის შესახებ, რომ 2014 წელს შეწყალებულ მსჯავრდებულ ირაკლი ქორიძეს ნათესაური კავშირი შეიძლება ჰქონდეს პრეზიდენტთან, შეწყალების კომისია არ ფლობდა. ამის შესახებ შეწყალების კომისიის თავმჯდომარემ, ზვიად ქორიძემ განაცხადა.

„თითქოს, ნათესაური კავშირი ჰქონდა პრეზიდენტთან ირაკლი ქორიძეს, ამის შესახებ არ ჰქონია კომისიას ინფორმაცია. როდესაც მედიასაშუალება ასეთი ტიპის ინფორმაციას ავრცელებს, მან გარკვეულწილად უნდა აიღოს პასუხისმგებლობაც, რადგან ამით ჩირქს სცხებს შეწყალების კომისიას. პრეზიდენტს რეკომენდაციას შეწყალების კომისია სთავაზობს და დღეს მიდის დეზინფორმაცია, თითქოს პრეზიდენტის ადმინისტრაცია მუშაობს შეწყალების აქტის მომზადებაზე. რეკომენდაციების შემდეგ თავად პრეზიდენტი იღებს გადაწყვეტილებას. ირაკლი ქორიძესთან დაკავშირებით კომისიის რეკომენდაცია იყო დადებითი. ჩვენ გათავისუფლება შევთავაზეთ და პრეზიდენტმა რეკომენდაცია გაითვალისწინა“, – განაცხადა ქორიძემ.

ქორიძემ აღნიშნა, რომ 2014 წლის იანვარში შეწყალებული ირაკლი ქორიძე არ იყო გასამართლებული ნარკორეალიზაციაზე.

შეწყალების კომისიის თავმდჯომარემ არ გამორიცხა, რომ ამ ინფორმაციით ცდილობენ, პრეზიდენტს შავი პიარი აუგორონ.

ქორიძის შეფასებით, ბოლოდროინდელი მოვლენები არის მიზანმიმართული შეტევა შეწყალების პროცესის მიმართ.

„შეწყალების პროცესის მიმართ მიმდინარე მოვლენები კიდევ ერთხელ ადასტურებს, რომ ეს არის მიზანმიმართული შეტევა არა მხოლოდ პრეზიდენტის წინააღმდეგ, არა მხოლოდ შეწყალების კომისიის იმ შემადგენლობის წინააღმდეგ, რომელიც დღეს მუშაობს ან მუშაობდა 2014 წელს. ეს არის მიზანმიმართული შეტევა შეწყალების პროცესისა და შეწყალების იდეის წინააღმდეგ. მინდა, ვთხოვო ყველას, ვინც ამ პროცესში მონაწილეობს და ცდილობს, თავისი სასარგებლო პოლიტიკური ქულა დაიწეროს, რომ ძალიან სწორად გაიაზრონ ეს, რადგან საზოგადოებისთვის მნიშვნელოვანია მაღალჰუმანური შეწყალების პროცესი, რომელიც დღეს საქართველოში წარმატებით ხორციელდება. ჩვენ ბოლო რამდენიმე დღეა ვაკვირდებით, როგორ მიზანმიმართულად ცდილობენ ამ პროცესის დანგრევას, ეს არის დაუშვებელი”, – განაცხადა ქორიძემ.

ირაკლი ქორიძე 2018 წლის 30 მარტს დააკავეს. მას ბრალი წაუყენეს ორგანიზებული ჯგუფის მიერ დიდი ოდენობით ნარკოტიკული საშუალებების საქართველოში შემოტანისთვის, შენახვისა და ტრანზიტისთვის.