პოლიტიკა

მიმდინარე წინასაარჩევნო კამპანიის ფარგლებში რუსთავი2-ის ეთერში არც ერთ დებატზე სამი პარტია არ დაიშვება

მიმდინარე წინასაარჩევნო კამპანიის ფარგლებში „ლეიბორისტული პარტია“, „დემოკრატიული მოძრაობა“ და „პატრიოტთა ალიანსი“ რუსთავი2-ს ეთერში გამართულ არც ერთ დებატში აღარ დაიშვება.

ამის შესახებ სოციალურ ქსელში ნიკა გვარამიამ დაწერა.

„დღეს, გადაცემა არჩევანი ყოველგვარი რელევანტური არგუმენტაციის გარეშე, შეთანხმებულად დატოვეს ლეიბორისტულმა პარტიამ, გაერთიანებულმა დემოკრატებმა და პატრიოტთა ალიანსმა. აღნიშნული ქმედებით, მათ უპატივცემლობა გამოხატეს გადაცემის, მისი წამყვანის, მთელი არხის და სტუდიაში დარჩენილი მათი კოლეგების მიმართ.

აღნიშნულიდან გამომდინარე, არხის გადაწყვეტილებით, არც ერთი ზემოაღნიშნული პარტიის კანდიდატი მიმდინარე წინასაარჩევნო კამპანიის ფარგლებში გამართულ არც ერთ დებატებში აღარ დაიშვება“,-დაწერა გვარამიამ.

„პატრიოტთა ალიანსის“, „დემოკრატიული მოძრაობა - საქართველოსა“ და „ლეიბორისტული პარტიის“ წევრებმა ტელეკომპანია რუსთავი2-ის გადაცემა „არჩევანი“ გუშინ პროტესტის ნიშნად დატოვეს.

მათი თქმით, გადაცემაში საკუთარი აზრის დაფიქსირების საშუალება არ მიეცათ.

მონიკა დავლიანიძე