პოლიტიკა

მიმდინარე წელს არანაკლებ 20 ობიექტის დახურვას ვვარაუდობთ, სადაც 350 დევნილი ოჯახი ცხოვრობს - გრიგოლ გიორგაძე

სიცოცხლისთვის შეუსაბამო და საშიში პირობების გამო წელს დაახლოებით 20 ობიექტი დაიხურება, სადაც 350 დევნილი ოჯახი ცხოვრობს. ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველმა მოადგილემ გრიგოლ გიორგაძემ განაცხადა ადამიანთა უფლებათა დაცვის კომიტეტის სხდომაზე, სადაც „2016 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ“ საქართველოს სახალხო დამცველის ანგარიშზე პარლამენტის მიერ გაცემული რეკომენდაციების შესრულების ანგარიშების მოსმენა მიმდინარეობს.

მარტო 2017 წელს დაიხურა 32 ობიექტი, სადაც 449 დევნილი ოჯახი ცხოვრობდა.

„რეკომენდაცია ეხებოდა დევნილთა კომპაქტური დასახლების ობიექტების მდგრადობის შეფასებას ექსპერტიზის მიერ. ეს რეკომენდაცია შესრულდა. ჩვენ ინტენსიურად ვახორციელებთ შეფასებას ახალი ობიექტების და ასევე ძველი დასკვნების გადაფასებასაც. გასულ წელს განხორციელდა 41 ობიექტზე ტექნიკური მდგომარეობის (მდგრადობა) შეფასება და მომზადდა შესაბამისი დასკვნები. 2017 წლის პერიოდში დაიხურა 32 ნგრევადი და სიცოცხლისთვის მომეტებული საფრთხის შემცველი ობიექტი, რაც წარმოადგენს 449 დევნილ ოჯახს. 2018 წლის განმავლობაშიც გრძელდება ეს მიდგომა. იცით, რომ ნორმატიულად ჩვენ კრიტერიუმების გარეშე გაგვყავს ობიექტებიდან დევნილი ოჯახები, სადაც ექსპერტიზის შეფასებით, სიცოცხლისთვის საშიში მდგომარეობაა. ჩვენ მიმდინარე წელს არანაკლებ 20 ობიექტის დახურვას ვვარაუდობთ, სადაც 350 დევნილი ოჯახია და შესაბამისად, კრიტერიუმების გარეშე მოხდება მათი გრძელვადიანი განსახლება. ასევე 50 ობიექტის შეფასება მოხდება“, - განაცხადა გიორგაძემ პარლამენტში.

ანა მებურიშვილი