პოლიტიკა

მიხეილ სააკაშვილმა უკრაინის საზღვრის უკანონოდ გადაკვეთის შესახებ ადმინისტრაციულ სამართალდარღვევათა ოქმს ხელი მოაწერა

ლვოვში, სასტუმრო ლეოპოლისის წინ, საქართველოს ყოფილმა პრეზიდენტმა და ოდესის ექს-გუბერნატორმა, მიხეილ სააკაშვილმა ხელი მოაწერა ადმინისტრაციული სამართალდარღვევის ოქმს, რომელიც ეხება უკრაინის საზღვრის უკანონოდ გადაკვეთას. მესაზღვრეებმა და პოლიციელებმა ჟურნალისტების თანდასწრებით საჯაროდ წაუკითხეს სააკაშვილს დოკუმენტის შინაარსი. ამის შესახებ იუწყება უკრაინული „24-ე არხი“.

როგორც სააკაშვილმა სასტუმროს წინ გამართულ ბრიფინგზე განმარტა, აღნიშნული ოქმი უნდა გადაცემულიყო საზღვრის გადაკვეთიდან სამი საათის განმავლობაში.

„ყველაფერი ძალიან მარტივია. ეს ოქმი უნდა მოეტანათ საზღვრის გადაკვეთიდან სამი საათის განმავლობაში. ისინი ვერ იტყვიან, რომ მე ვემალებოდი. მე ვიყავი ლვოვის მთავარ მოედანზე ათასობით ლვოველთან ერთად, მაშინ უპრობლემოდ ავიღებდი ამ ოქმს, მაგრამ ახლა, რასაც აკეთებენ კანონდარღვევაა“, -განაცხადა სააკაშვილმა.

შეგახსენებთ, დღეს დილას სასტუმროში, სადაც მიხეილ სააკაშვილი დაბინავდა, სამართალდამცავი ორგანოების წარმომადგენლები მივიდნენ. შემდგომში მათ განმარტეს, რომ საჭირო იყო ოქმის გაცნობა ოდესის ყოფილი გუბერნატორისთვის, რომელმაც კანონი დაარღვია და უკრაინის საზღვარი უკანონოდ გადალახა.

10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი