პოლიტიკა

მიხეილ სააკაშვილის საქართველოში ექსტრადირებაზე საუბარი ნაადრევია - სულხან სალაძე

„საქართველოს ახალგაზრდა იურისტთა ასოციაციის“ თავმჯდომარის, სულხან სალაძის განცხადებით, საქართველოს ყოფილი პრეზიდენტისა და ოდესის ექს-გუბერნატორის მიხეილ სააკაშვილის ექსტრადირებაზე საუბარი ნაადრევია. მისი განმარტებით, „ახალი ძალების მოძრაობის“ ლიდერის მიმართ წაყენებული ბრალდებები ამას არ ითვალისწინებს.

„როგორც ვიცით, საქართველოს ხელისუფლებას თავის დროზე ჰქონდა უკრაინული მხარისადმი მიმართვა გადმოცემასთან დაკავშირებით, თუმცა მაშინ ეს არ მოხდა. ის დოკუმენტაცია და ის მოცემულობა, რომელიც მაშინ იყო, პრინციპში გამორიცხავს მიხეილ სააკაშვილის საქართველოსთვის გადმოცემას. თუ რაიმე ახალი მტკიცებულებები არის, ჩვენთვის უცნობია და ამ თემაზე პროკურატურამ, სამართალდამცველებმა მეტი ინფორმაცია უნდა მოგვაწოდოს.

ჩვენ როგორც ვიცით, უკრაინაში დავა სააკაშვილთან მიდის სულ სხვა საკითხებზე, რომელიც არ არის დაკავშირებული საქართველოში შესაძლო ჩადენილ დანაშაულთან. ასე რომ, ამ მოცემულობით ნაადრევია ჯერ მიხეილ სააკაშვილის საქართველოში ექსტრადირებაზე საუბარი“, -უთხრა სალაძემ ჟურნალისტებს.

მიხეილ სააკაშვილი კიევში 8 დეკემბერს დააკავეს. მის წინააღმდეგ გამოძიება სამი მუხლით მიმდინარეობს, ესენია: უკრაინის სისხლის სამართლის კოდექსის 15-ე მუხლი (თავდასხმა, დანაშაულის მცდელობა), 28-ე მეორე მუხლის მეორე ნაწილი (დანაშაულის ჩადენა პირთა ჯგუფის მიერ წინასწარი განზრახვით) და 256-ე მუხლის მეორე ნაწილი (დანაშაულებრივი ჯგუფის წევრთა ხელშეწყობა და მათი დანაშაულებრივი საქმიანობის დამალვა).

დღეს სააკაშვილის სასამართლო პროცესი გაიმართება.

ანა მებურიშვილი