პოლიტიკა

მიხეილ სააკაშვილის ხელმოწერის გაყალბების ფაქტზე შეიძლება გამოძიების დაწყება - სააკაშვილის ადვოკატი

მიხეილ სააკაშვილის ადვოკატის, პაველ ბოგომაზოვის თქმით, ოდესის ყოფილი გუბერნატორის განცხადება მისი ხელმოწერის გაყალბების შესახებ შეიძლება გამოძიების დაწყების საბაბი გახდეს. კერძოდ, როგორც სააკაშვილმა გუშინ ფეისბუკის საკუთარ გვერდზე დაწერა, დოკუმენტზე, რომლის საფუძველზე უკრაინის პრეზიდენტმა პეტრო პოროშენკომ ქვეყნის მოქალაქეობა ჩამოართვა, მისი ხელმოწერა გაყალბებულია.

„შეიძლება სისხლის სამართლის საქმის წარმოება იმ თანამდებობის პირების წინააღმდეგ, ვისთანაც იყო დოკუმენტები სააკაშვილისთვის მოქალაქეობის მინიჭების შესახებ“, - განუცხადა საქართველოს ექს-პრეზიდენტის ადვოკატმა ТАСС-ს.

ბოგომაზოვმა ასევე აღნიშნა, რომ ჯერჯერობით სააკაშვილს არაფერი არ უთქვამს „სარჩელის შეტანის აუცილებლობაზე“.

ადვოკატის თქმით, ისინი ვერ გაასაჩივრებენ უკრაინის პრეზიდენტის გადაწყვეტილებას შესაბამისი დოკუმენტების არარსებობის გამო.

„ამ დროისთვის ჩვენ არ გადმოგვცეს დოკუმენტები სააკაშვილისთვის მოქალაქეობის ჩამორთმევის შესახებ. ეს დიდი პრობლემაა, რადგან ადვოკატებს დაცვის შესაძლებლობას გვართმევენ, რადგან არ გვაძლევენ არც პრეზიდნეტის განკარგულებას - პერსონალური მონაცემებითა თუ მათ გარეშე, არც სახელმწიფო საიმიგრაციო სამსახურის დოკუმენტებს, სადაც შეგვეძლო გვენახა, რა დოკუმენტები აქვთ და რა საფუძველი არსებობს“, - თქვა ბოგომაზოვმა.

ადვოკატის თქმით, მისთვის უცნობია, როდის დაბრუნდება სააკაშვილი უკრაინაში. ბოლო ინფორმაციით, მიხეილ სააკაშვილი აშშ-ში იმყოფება.

შეგახსენებთ, მიხეილ სააკაშვილს უკრაინის მოქალაქეობა 26 ივლისს ჩამოართვეს. როგორც უკრაინის პრეზიდენტის ადმინისტრაციამ „ინტერფაქს-უკრაინას“ განუცხადა, ამის მიზეზი გახდა უკრაინის მოქალაქეობაზე შესაბამისი დოკუმენტების შევსების დროს მიწოდებული არასწორი ინფორმაცია.

ანა მებურიშვილი