პოლიტიკა

მიხეილ სააკაშვილი არ დაკარგულა, ის დღეიდან პოლიტიკურ ტურნეს იწყებს

დღეიდან საქართველოს ყოფილი პრეზიდენტი და ოდესის ექს-გუბერნატორი მიხეილ სააკაშვილი უკრაინაში ტურნეს იწყებს. შესაბამისი პოსტი მან ფეისბუკის საკუთარ გვედრზე გამოაქვეყნა. პირველი აქცია ქალაქ ჩერნოვცებში გაიმართება.

სააკაშვილის ადვოკატის განცხადებას, რომ ოდესის ექს-გუბერნატორი ღამით ლვოვის სასტუმრო „ლეოპოლისში“ არ დაბრუნებულა, გამოეხმაურა პარტია „ახალი ძალების მოძრაობის“ წარმომადგენელი, რომლის ვინაობა Unian.net-მა არ გაასაჯაროვა. პარტიის წევრის ინფორმაციით, მიხეილ სააკაშვილის ადგილმდებარეობის შესახებ მხოლოდ უახლოესმა გარემოცვამ იცის, რათა შესაძლო პროვოკაციები თავიდან იყოს აცილებული.

„ჯერ კიდევ გუშინ განიხილებოდა, თუ როგორ იყოს ჩატარებული 13 სექტემბრის მიტინგი, ხალხთან შეხვედრა ჩერნოვცებში. როგორ და სად წასვლის კონკრეტული გეგმები არ იყო, ამიტომ ამჟამად სააკაშვილის ადგილმდებარეობის შესახებ იცის მხოლოდ უახლოესმა გარემოცვამ, მორიგი პროვოკაციების თავიდან ასაცილებლად“, -განუცხადა „ახალი ძალების მოძრაობის “ წევრმა Unian.net-ს.

შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

გუშინ ლვოვში, სასტუმრო ლეოპოლისის წინ სააკაშვილმა ხელი მოაწერა ადმინისტრაციული სამართალდარღვევათა პროტოკოლს უკრაინის საზღვრის უკანონოდ გადაკვეთის შესახებ. მისი საქმის სასამართლო განხილვა 18 სექტემბერს გაიმართება.

ანა მებურიშვილი