პოლიტიკა

მიხეილ ჯანელიძემ სტრატეგიულ პარტნიორებთან და მეგობარ სახელმწიფოებთან ორმხრივი თანამშრომლობის ფორმატში არსებული ურთიერთობები მიმოიხილა

საქართველოს პარლამენტის საგარეო ურთიერთობათა და ევროინტეგრაციის კომიტეტების გაერთიანებულ სხდომაზე სიტყვით გამოსვლისას საქართველოს საგარეო საქმეთა მინისტრმა მიხეილ ჯანელიძემ მიმოიხილა ორმხრივი თანამშრომლობის ფორმატში არსებული ურთიერთობები სტრატეგიულ პარტნიორებთან და მეგობარ სახელმწიფოებთან.

როგორც მედიანიუსს საქართველოს საგარეო საქმეთა სამინისტროდან აცნობეს, მინისტრმა განსაკუთრებული ყურადღება გაამახვილა აშშ-სთან საქართველოს სტრატეგიულ პარტნიორობაზე.

მისი თქმით, მომდევნო წლების განმავლობაში, ისევე როგორც გასულ პერიოდში საქართველოსთვის საგარეო პოლიტიკის ერთ-ერთი მთავარი პრიორიტეტი იქნება აშშ-სთან ურთიერთობა.

„ამერიკის შეერთებულ შტატებთან თანამშრომლობა იქნება ძალიან მნიშვნელოვანი როგორც საგარეო საქმეთა სამინისტროსთვის, ასევე ყველა სამთავრობო უწყებისთვის, მათ შორის საპარლამენტო მიმართულებითაც. ახალი ადმინისტრაციის პირობებში ჩვენ განსაკუთრებული აქტივობა გვჭირდება. უკვე გვაქვს პირველი კონტაქტები სამომავლო ადმინისტრაციის წევრებთან და ასევე პოლიტიკურ ჯგუფებთან, რათა საქართველოს საკითხი ისევე იყოს აქტუალური ამერიკის საგარეო პოლიტიკაში, როგორც არის ბოლო 25 წლის მანძილზე, როცა ჩვენი სტრატეგიული თანამშრომლობა განსაკუთრებით ღრმავდებოდა“ - განაცხადა მინისტრმა.

მან ხაზი გაუსვა აშშ-სთან თავდაცვის, განათლების და ეკონომიკის სფეროში თანამშრომლობის მნიშვნელობას.

საკუთარ გამოსვლაში მიმოიხილა ევროპის ქვეყნებთან ორმხრივი თანამშრომლობა. მისი განცხადებით საქართველოს პრიორიტეტია დასავლეთ ევროპის ქვეყნებთან სტრატეგიული თანამშრომლობის განვითარება, ისევე როგორც თანამშრომლობის განვითარება სხვადასხვა ფორმატში საქართველოს ტრადიციულ მეგობრებთან - აღმოსავლეთ ევროპისა და ბალტიისპირეთის ქვეყნებთან.

მინისტრმა უპრეცედენტო უწოდა მიმდინარე წელს საქართველო-გერმანიის თანამშრომლობას და აღნიშნა, რომ ეს ურთიერთობები განსაკუთრებულ მნიშვნელობას შეიძენს 2017 წლის განმალობაში, როდესაც აღინიშნება საქართველო-გერმანიის მეგობრობის 200 წლის იუბილე.

„ამ თანამშრომლობამ გამოიღო ის შედეგი, რომ გერმანიამ საქართველოს ვიზის ლიბერალიზაციასთან დაკავშირებით მიიღო მნიშვნელოვანი გადაწყვეტილება როგორც შიდა პოლიტიკურ, ასევე ევროკავშირის კონტექსტში არსებულ რთული პერიოდის გათვალისწინებით“, - განაცხადა მინისტრმა.

მინისტრმა ასევე გამოჰყო მიმდინარე წელს საფრანგეთთან თავდაცვის სფეროში თანამშრომლობა, იტალიის საგარეო საქმეთა მინისტრის პირველი ოფიციალური ვიზიტი საქართველოში, ასევე სტრატეგიული თანამშრომლობის ფორმატში ურთიერთობების გადაყვანა დიდ ბრიტანეთთან და თურქეთის რესპუბლიკასთან.

მიხეილ ჯანელიძის განცხადებით მომდევნო წელი ასევე მნიშვნელოვანი იქნება აღმოსავლეთის ქვეყნებთან თანამშრომლობის განვითარების თვალსაზრისით.