პოლიტიკა

მგონია, სიტყვა წასცდა ან იფიქრა, რომ თავისი განცხადებით კონფლიქტის მხარეებს შორის ურთიერთობას მოაგვარებს - გია ვოლსკი ჰერბერტ ზალბერის განცხადებაზე

საპარლამენტო უმრავლესობის წევრის გია ვოლსკის განცხადებით, ევროკავშირის სპეციალური წარმომადგენლის სამხრეთ კავკასიასა და საქართველოს კრიზისების საკითხებში ჰერბერტ ზალბერის ბიბილოვისადმი გაკეთებული განცხადება არის საქართველოსადმი გადადგმული არაკორექტული დიპლომატიური ნაბიჯი.

„მგონია, რომ სიტყვა წასცდა ან იფიქრა, რომ თავისი განცხადებით რაღაც ურთიერთობას მოაგვარებს და ჟენევაში ამ პროცესის განვითარებას ხელს შეუწყობს, რაც სიღრმისეული შეცდომაა. არ მინდა, ეს საკითხი ან მისი ეს გადაცდომა საქართველოსთან მიმართებაში ევროკავშირის პოლიტიკას დავუკავშირო, რადგან არასწორი ვიქნები. მაგრამ ამ პიროვნებამ განცხადება თავად უნდა გააკეთოს. ეს არც არაფერს უწყობს ხელს და საქართველოს მიმართ კიდევ არაკორექტულ დიპლომატიურ ნაბიჯს დგამს. ეს ევროკავშირის პოლიტიკასთან დაკავშირებული არ არის, რომლის შესახებაც ძალიან კარგად ვიცით“, - განაცხადა ვოლსკიმ.

შეგახსენებთ, რომ ჰერბერტ ზალბერი გუშინ ოკუპირებული სამხრეთ ოსეთის ე.წ. პრეზიდენტ ანატოლი ბიბილოვს შეხვდა და მას ე.წ. საპრეზიდენტო არჩევნებში გამარჯვება მიულოცა. ამის გამო საქართველოში ევროკავშირის ელჩი იანოშ ჰერმანი საგარეო საქმეთა სამინისტროში დაიბარეს.

ანა მებურიშვილი