პოლიტიკა

მგონია პრეზიდენტი „მაუწყებლობის შესახებ“ კანონპროექტს ვეტოს დაადებს - სოფიო კილაძე

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, სოფიო კილაძის შეფასებით, პრეზიდენტი ვეტოს დაადებს „მაუწყებლობის შესახებ“ კანონპროექტს.

„ჩემი სუბიექტური, პირადი შეხედულებით, პრეზიდენტი ალბათ ვეტოს დაადებს. ასე მგონია“, - განაცხადა დეპუტატმა.

დღეს 10-დღიანი ვადა იწურება, რომლის შედეგად გიორგი მარგველაშვილმა უნდა გადაწყვიტოს, მოაწერს ხელს პარლამენტის მიერ 3 მოსმენით მხარდაჭერილ დოკუმენტს თუ დააბრუნებს უკან მოტივირებული შენიშვნებით.

კილაძის თქმით, მისთვის მისაღებია კანონპროექტის მხარდამჭერი პირების პოზიცია.

„რაც შეეხება არგუმენტებს, არ ვიცი, რა არგუმენტები ექნება პრეზიდენტს, მაგრამ ის არგუმენტები, რაც მე აქამდე მომისმენია სხვადასხვა დაინტერესებული მხარისგან , მათ შორის ჩემი კოლეგებისგან, მგონია, რომ უფრო წონადი არგუმენტები აქვს იმათ, ვინც მხარს უჭერს მაუწყებლობის შესახებ კანონს“, -აღნიშნა კილაძემ.

რაც შეეხება შესაძლო საფრთხეებს, რაზეც საუბრობენ დოკუმენტის მოწინააღმდეგეები, კილაძემ განაცხადა, რომ კანონპროექტი მედიაბაზარს არ დააზარალებს.

მან განმარტა, რომ საზოგადოებრივ მაუწყებელს კომერციული რეკლამის განთავსების უფლება მხოლოდ დროის მცირე მონაკვეთზე ენიჭება.

„პრობლემას ვერ ვხედავ, ვინაიდან ის ხომ არ ითვისებს მთლიან სარეკლამო ბადეს, არის დროის მინიმალიური მონაკვეთი , რაც საზოგადოებრივ მაუწყებელს რეკლამისთვის ექნება გამოყოფილი. აქედან გამომდინარე, ეს ვერ მოახდენს ზეგავლენას სხვა ტელევიზიების კონკურენტუნარიუანობაზე“, - თქვა კილაძემ.

საკანონმდებლო ორგანომ აღნიშნული კანონპროექტი მესამე მოსმენით 22 დეკემბერს დაამტკიცა. „მაუწყებლობის შესახებ“ კანონპროექტს მხარი დაუჭირა 63-მა პარლამენტარმა.

ამის შემდეგ დოკუმენტი ხელმწოსაწერად პრეზიდენტს გადაეგზავნა.

საკანონმდებლო ცვლილებების მიხედვით, საზოგადოებრივი მაუწყებელი ბიუჯეტიდან დაფინანსების პარალელურად, კომერციული რეკლამის განთავსებასაც შეძლებს.