პოლიტიკა

მგონია, ეს რეკომენდაცია ჰგავს ღია კარის მტვრევას - არჩილ თალაკვაძე „ევროპული საქართველოს“ რეკომენდაციას არ ეთანხმება

ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიაში შემავალი საპრლამენტო უმრავლესობის წევრები არ დაეთანხმნენ „ევროპული საქართველოს“ რეკომენდაციას, რომ შსს-მ დაუყოვნებლივ დაიწყოს გამოძიება ხორავას ქუჩაზე არასრულწლოვან გ.მ-ს ცივი იარაღით დაჭრის ფაქტზე.

არჩილ თალაკვაძის შეფასებით, აღნიშნული რეკომენდაცია ჰგავს ღია კარის მტვრევას, რადგან ამაზე გამოძიება მიმდინარეობს.

„ვინაიდან ამ კომისიის მთავარი ამოცანა და მისია არის, რომ საზოგადოებას ვუთხრათ სიმართლე ყოველგვარი მიკერძოების გარეშე, მე ვალდებული ვარ გამოვეხმაურო დასკვნას, რომელიც ოთარ კახიძემ გააკეთა.

თქვენ დაეყრდენით თქვენს მსჯელობაში იმას, რომ თავიდანვე გამოძიებამ იცოდა გ.მ.-ს დაჭრის შესახებ და ამასთან დაკავშირებით არაფერი არ გააკეთა და დღეს აუცილებელია, ცალკე გამოიყოს ეს საქმეო.

ფაქტობრივად გეტყვით, ახლა საქმეში რა არის. ფაქტობრივად ჩანს, რომ სასამართლოში, 27 დეკემბერს ამ საქმიდან ცალკე წარმოებად გამოიყო სისხლის სამართლის საქმე, რომლის ფარგლებშიც, მათ შორის გ.მ-ის დაჭრა არის პირდაპირ დაფიქსირებული და გამოძიების ერთ-ერთი საქმეა. შესაბამისად, ის, რომ გამოძიება არ დაინტერესდა თავიდანვე, არ არის სწორი.

ამასთან, გ.მ-ს დაჭრის ფაქტზე ექსპერტიზის დასკვნა მოვიდა სასამართლო გადაწყვეტილების დროს.

შესაბამისად, მანამდე იმაზე მეტი, რაც იყო გაკეთებული და როგორც დაინტერესდა გამოძიება,

ფიზიკურად ვერ გაკეთდებოდა. შემდგომში უკვე ამ ცალკე გამოყოფილი საქმის ფარგლებში ეს საკითხი გახდა გამოძიების დაინტერესების საკითხი. შესაბამისად, გ.მ-ის დაჭრის ფაქტზე მიმდინარეობს გამოძიება.

პრაქტიკაში ბევრია ფაქტები, როდესაც ერთი საქმის ფარგლებში სხვადასხვა ურთიერთდაკავშირებულ შემთხვევებზე იწყება გამოძიება. შესაბამისად, ეს რეკომენდაცია, მგონია, რომ ჰგავს ღია კარის მტვრევას. თუ ჩვენი მიზანია, რომ ამ ფაქტზე გამოძიება ჩატარდეს, შსს უკვე აწარმოებს გამოძიებას“, - განმარტა თალაკვაძემ კომისიის დღევანდელ სხდომაზე.