პოლიტიკა

მესამე მოსმენამდე დარჩენილ დროში შეთანხმების მიღწევა იქნება შეუძლებელი - ეკა ბესელია საკონსტიტუციო ცვლილებებზე

პარლამენტის იურიდიულ საკითხთა თავმჯდომარის, ეკა ბესელიას განცხადებით, ამ ეტაპზე შეუძლებელია მმართველ გუნდსა და ოპოზიციის შორის შეთანხმების მიღწევა საკონსტიტუციო ცვლილებებზე.

„ჩვენ დავტოვეთ დიალოგისა და დისკუსიის ღია სივრცე. ვცადეთ, რომ გამოყენებულიყო ყველა შესაძლებლობა კონსტიტუციის მესამე მოსმენით გადაწყვეტილების მიღებამდე, რომ ეს დრო გამოყენებული ყოფილიყო დამატებითი დისკუსიისთვის. სამწუხაროდ, ჯერჯერობით, არ ჩანს კონსტრუქციული მიდგომა და წინაპირობა რაიმე ტიპის კონსენსუსის. ჩვენი მხრიდან გადადგმული იქნა ყველა ნაბიჯი ამ შეთანხმებისთვის, მაგრამ, სამწუხაროდ, ამას არ მოჰყვა შემხვედრი რაციონალური გადაწყვეტილებები. ჯერჯერობით, მე ამ ეტაპზე ვერ ვხედავ, რა შეიძლება იყოს შეთანხმების დამატებითი სახით გამოყენებული. ამ დროში, რაც დარჩენილია მესამე მოსმენამდე, როგორც ჩანს, შეთანხმება იქნება შეუძლებელი“, - განუცხადა ბესელიამ ჟურნალისტებს.

ბესელიას განმარტებით, ოპოზიცია წერილების მეშვეობით „ულტიმატუმის“ ენით ესაუბრებოდა მმართველ გუნდს.

ანა მებურიშვილი