პოლიტიკა

მერიას „ხრუშჩოვკების“ ჩანაცვლების პროექტისთვის არანაირი რესურსი არ აქვს - კახა კალაძე

მმართველი გუნდის თბილისის მერობის კანდიდატის, კახა კალაძის განცხადებით, „ხრუშჩოვკების“ ჩანაცვლების პროცესი არა ერთბაშად, არამედ ეტაპობრივად უნდა განხორციელდეს. ამის შესახებ მან „კვირის პალიტრასთან“ ინტერვიუში განაცხადა.

კალაძის განმარტებით, ამ პროექტის განხორციელებას მხოლოდ მერია ვერ შეძლებს.

„ქალაქის სხვადასხვა რაიონში 500-ზე მეტი „ხრუშჩოვკაა“ და ისინი უნდა ჩანაცვლდეს არა ერთბაშად, არამედ თანდათანობით. ბევრმა ეს ისე გაიგო, თითქოს მერია აპირებდა ამის გაკეთებას. მერიას საამისოდ არანაირი რესურსი არ აქვს“, - თქვა კალაძემ.

თბილისის მერობის კანდიდატის თქმით, „ხრუშჩოვკების“ ჩანაცვლების პროცესში მთავარ როლს მათი მაცხოვრებლები ითამაშებენ. მერიის პროექტი იმ შემთხვევაში ამოქმედდება, თუკი კონკრეტული კორპუსის მაცხოვრებლები ინვესტორის შემოყვანას დათანხმდებიან.

„ამ საქმეში მთავარია „ხრუშჩოვკებში“ მობინადრე მოსახლეობა, რომლებმაც უნდა შექმნას ამხანაგობები.

თუ ერთი კორპუსის მობინადრენი გაერთიანდებიან და შეთანხმდებიან, რომ შევიდეს ინვესტორი, სწორედ აქ ამოქმედდება მერიის პროექტი. როგორც ვიცი, მიმდინარეობს მუშაობა რამდენიმე უბანში: ვარკეთილში, საბურთალოზე. მოსახელობა დაინტერესებულია“, - თქვა მერობის კანდიდატმა.

კალაძის მტკიცებით, ამ პროექტით დაინტერესებული არიან დეველოპერებიც.

„სურვილი არის, თუმცა ეს ყველაფერი სამუშაო პროცესში გამოჩნდება. მთავარია, ახალი გენერალური გეგმის ფარგლებში საამისოდ როგორი კოეფიციენტი გვექნება. ჩემი ხედვა ასეთია - ქალაქის ცენტრალურ უბნებში კოეფიციენტი არ უნდა გაიცეს. ახლა მორატორუმია შემოღებული, მაგრამ, ჩემი აზრით, საერთოდ უნდა გავაუქმოთ ცენტრალურ უბნებში კოეფიციენტების გაცემა“, -თქვა კალაძემ.

შეგახსენებთ, 30 ივლისს კახა კალაძემ ფეისბუკის საკუთარ გვერდზე ვიდეომიმართვა გაავრცელა, სადაც ე.წ. „ხრუშოვკების“ პრობლემაზე ისაუბრა. მმართველი გუნდის მერობის კანდიდატის განცხადებით, მას აქვს მომზადებული პროექტი, რომელიც გულისხმობს თბილისის გათავისუფლებას „ამ საბჭოთა იდეოლოგიის გადმონაშთებისგან“ და „ხრუშოვკების“ ჩანაცვლებას „თანამედროვე, მყარი, კომფორტული საცხოვრისით“. კალაძემ აღნიშნა, რომ „ხრუშოვკის“ მაცხოვრებლები ჩანაცვლების პროცესში უზრუნველყოფილნი იქნებიან ბინით ან შესაბამისი კომპენსაციით (ისინი თვითონ აარჩევენ).

ადგილობრივი თვითმმართველობის არჩევნები 21 ოქტომბერს გაიმართება.

ანა მებურიშვილი