სამართალი

მერაბიშვილის განცხადება ჩემთვის მოულოდნელი არ ყოფილა - ოთარ კახიძე

„ევროპული საქართველოს“ წევრი და ვანო მერაბიშვილის ადვოკატი ოთარ კახიძე გამოეხმაურა მერაბიშვილის გადაწყვეტილებას „ნაციონალური მოძრაობის“ გენერალური მდივნის პოსტიდან წასვლის შესახებ.

კახიძის თქმით, ეს მისთვის მოულოდნელი არ ყოფილა.

ადვოკატი ამბობს, რომ მერაბიშვილი სტრასბურგის სასამართლოს გადაწყვეტილების მიღებამდე პოლიტიკურ განცხადებას არ გააკეთებს.

„ერთი ის ვიცი, რომ პოლიტიკური განცხადებების გაკეთებას არ აპირებს, ვიდრე არ დასრულდება სტრასბურგში, ადამიანის უფლებათა ევროპული სასამართლოს დიდ პალატაში მისი საქმის განხილვა“, - აცხადებს კახიძე.

სტრასბურგის სასამართლოში გასაჩივრებულია ევროკონვენციის მე-18 მუხლის დარღვევა, რომელიც გულისხმობს შეზღუდვათა გამოყენების წესის ფარგლებს.

საუბარია სტრასბურგის სასამართლოს ერთ-ერთი პალატის (2016 წლის 14 ივნისის) გადაწყვეტილების გასაჩივრებაზე და კონკრეტულად, აქცენტი კეთდება ვანო მერაბიშვილის საკნიდან სავარაუდო გაყვანის ეპიზოდზე.

ანა მებურიშვილი