პოლიტიკა

მეორე ტურის თარიღის ოფიციალურად გამოცხადების შემდეგ სალომე ზურაბიშვილი ძალიან აქტიურ, ძალიან ეფექტიან კამპანიას დაიწყებს - მარიამ ჯაში

საპარლამენტო უმრავლესობის წევრის, მარიამ ჯაშის განცხადებით, საპრეზიდენტო არჩევნების მეორე ტურისთვის მოსამზადებელი სამუშაოები ინტენსიურ რეჟიმში მიმდინარეობს.

როგორც მან ჟურნალისტებს „ქართული ოცნების“ ოფისთან განუცხადა, მეორე ტურის თარიღის გამოცხადების შემდეგ მმართველის პარტიის მიერ მხარდაჭერილი საპრეზიდენტო კანდიდატი სალომე ზურაბიშვილი აქტიურ კამპანიას დაიწყებს.

„ველოდებით მეორე ტურის თარიღის ოფიციალურად გამოცხადებას, რის შემდეგაც სალომე ზურაბიშვილი ძალიან აქტიურ, ძალიან ეფექტიან კამპანიას დაიწყებს. პარალელურ რეჟიმში დაწყებულია სამუშაო შეხვედრები რეგიონებში, რომ მაქსიმალურად ყველა რეგიონს ვეწვიოთ და ჩვენი სათქმელი მივიტანოთ ხალხამდე იმ გზავნილის საპასუხოდ, რომელიც მივიღეთ პირველ ტურში. დარწმუნებული ვართ, მეორე ტური იქნება დამაჯერებელი გამარჯვება“, – განაცხადა ჯაშმა.

მისივე თქმით, სალომე ზურაბიშვილი ყოველდღიურ რეჟიმში არის ჩართული „ქართული ოცნების“ ლიდერებთან კონსულტაციებში.

„როგორც მოგახსენეთ, კამპანიის მეორე ფაზა დაიწყება უახლოეს პერიოდში, როგორც კი არჩევნების მეორე ტურის თარიღი ოფიციალურად გახდება ცნობილი. ეს იქნება ეფექტიანი კამპანია“, – განაცხადა დეპუტატმა.

როგორც მან აღნიშნა, მმართველი გუნდის მთავარი მესიჯი მეორე ტურში მაქსიმალური ჩართულობასთან დაკავშირებით მოსახლეობისადმი თხოვნა იქნება.