პოლიტიკა

,,მემარცხენე ალიანსი’’ მთავრობას და პარლამენტს კრიზისიდან გამოსვლის გზებს სთავაზობს

“მემარცხენე ალიანსის” გენერალურმა მდივანმა, სოსო შატბერაშვილმა პარტიის ცენტრალურ ოფისში დღეს გამართულ ბრიფინგზე საქართველოს პრემიერ-მინისტრსა და პარლამენტის თავმჯდომარეს საკანონმდებლო ინიციატივით მიმართა და ონლაინ და სხვა სესხების კაბალური საპროცენტო განაკვეთის გამო შექმნილი კრიზისიდან გამოსვლის გზები შესთავაზა.

როგორც შატბერაშვილმა განაცხადა, კანონში უნდა შევიდეს ცვლილება, რომლითაც ,,ბოლო მოეღება მიკროსაფინანსო ორგანიზაციებსა და ბანკებში არსებულ განუკითხაობას, დაასტაბილურებს ლარს და მოსახლეობისათვის ხელმისაწვდომს გახდის იაფ კრედიტს.’’

„ქვეყანაში შექმნილია უმძიმესი ეკონომიური მდგომარეობა, რაც სამწუხაროდ ყველაზე ნათლად აისახა ლარის კურსზე. ხელისუფლება ცდილობს ამ მძიმე მდგომარეობიდან გამოსავლის პოვნას, რაც გამოიხატა იმაში, რომ აპირებენ ე.წ. ონლაინ-სესხების აკრძალვას. ეს ნამდვილად მისასალმებელი ინიციატივაა, მაგრამ ეს პრობლემის გადაჭრის მხოლოდ მცირედი ნაწილია. მიკროსაფინანსო ორგანიზაციები მაინც გააგრძელებენ თავაშვებულ მოქმედებას.

ამასთან დაკავშირებით ხელისუფლებას ვთავაზობთ კრიზისიდან გამოსვლის კონკრეტულ წინადადებას.

ცნობილია, რომ იპოთეკური სესხის საპროცენტო განაკვეთები რეგულირდება საქართველოს სამოქალაქო კოდექსით (მუხლი 625) და მისი მაქსიმალური რაოდენობა შეადგენს წლიურ 16%-ს. ეს რეგულაცია მხოლოდ იპოთეკურ სესხებს შეეხება.

შემოვდივართ წინადადებით, კანონში შეტანილ იქნას ცვლილება და ზემოთ აღნიშნული საპროცენტო რეგულაცია გავრცელდეს ყველა სახის სესხზე. ეს ბოლოს მოუღებს მიკროსაფინანსო ორგანიზაციებსა და ბანკებში არსებულ განუკითხაობას, დაასტაბილურებს ლარს და მოსახლეობისათვის ხელმისაწვდომს გახდის იაფ კრედიტს“, – განაცხადა სოსო შატბერაშვილმა.

ნინო ექვთიმიშვილი