პოლიტიკა

მეგობარი ქვეყნების ჩართულობით უნდა შეიქმნას საქართველოს ანტიანექსიური პოლიტიკა - გიორგი მარგველაშვილი

საქართველოს პრეზიდენტის გიორგი მარგველაშვილის განცხადებით, რუსეთი დგამს ნაბიჯებს საქართველოს ოკუპირებული ტერიტორიების ფაქტობრივი ანექსიის მიმართულებით.

ამის შესახებ მარგველაშვილმა პარლამენტში ყოველწლიური მოხსენების დროს განაცხადა.

მისი თქმით, როგორც არაღიარების პოლიტიკის შემთხვევაში, საქართველოს მეგობარი სახელმწიფოების აქტიური ჩართულობით უნდა „შეიქმნას საქართველოს ოკუპირებული ტერიტორიების ანტიანექსიური პოლიტიკა და გადაიდგას შეთანხმებული ნაბიჯები ანექსიის თავიდან ასაცილებლად“.

„ამავე დროს, არ შეიძლება დღესვე უმწვავესი რეაქცია არ გვქონდეს ახალი გამყოფი ხაზებისა და მავთულხლართების გავლების პოლიტიკაზე, გალის რაიონის სკოლებში ქართულენოვანი სწავლების შეზღუდვაზე, ადამიანების გატაცებისა და ოკუპირებულ ტერიტორიებზე კულტურული ძეგლების ხელყოფის ფაქტებზე“, - განაცხადა გიორგი მარგველაშვილმა.

პრეზიდენტის განმარტებით, ქვეყნისთვის მნიშვნელოვან თემებზე ყველა ერთიანი უნდა იყოს.

„მინდა, მივმართო ოკუპირებულ ტერიტორიებზე მცხოვრებ ჩვენს მოქალაქეებს - ვერავინ წარმოიდგენდა, რომ ბერლინის კედელი დაინგრეოდა და გაერთიანებული გერმანიის ლიდერი, აღმოსავლეთ გერმანიის მკვიდრი გახდებოდა. იმედი მაქვს, დადგება დრო, როდესაც საქართველოში ხელოვნურად აღმართული კედლებიც დაინგრევა და ერთიანი საქართველოს ლიდერი, კედლის მიღმა მცხოვრები საქართველოს მოქალაქე გახდება. დადგება დრო, როდესაც აფხაზეთსა და ცხინვალის რეგიონთან გახლეჩილი საზოგადოება გაერთიანდება, როდესაც ქართველები, აფხაზები, ოსები შევძლებთ ვიპოვოთ ეს გამაერთიანებელი, როდესაც დევნილები უსაფრთხოდ დაბრუნდებიან“, - განაცხადა გიორგი მარგველაშვილმა.

მონიკა დავლიანიძე