პოლიტიკა

მედიასივრცეში წამოწეული თემები რეალობასთან მიახლოებულია - გია ვოლსკი

ის თემები, რომელიც მედიასივრცეში არის წამოწეული, რეალობასთან არის მიახლოებული, თუმცა ოფიციალური განცხადების გაკეთების საფუძველი ჯერ არ გვაქვს, - ასე გამოეხმაურა ,,ქართული ოცნება - დემოკრატიული საქართველოს’’ პოლიტიკური საბჭოს წევრი მედიაში გავრცელებულ ვერსიებს მთავრობასა და პარლამენტში თანამდებობების გადანაწილებასთან დაკავშირებით.

,,არანაირი განცხადება ამასთან დაკავშირებით არ იქნება მართებული დღეს, სანამ არ შედგება პოლიტსაბჭო და არ იქნება განცხადებები. ის თემები, რომელიც მედიასივრცეში არის წამოწეული რეალობასთან არის მიახლოვებული, თუმცა ოფიციალური განცხადების გაკეთების საფუძველი ჯერ არ გვაქვს, სანამ საბოლოო გადაწყვეტილება არ იქნება მიღებული’’, - განუცხადა ჟურნალისტებს გია ვოლსკიმ კაჭრეთის ,,ამბასადორში’’, სადაც მმართველი გუნდის შეხვედრა მიმდინარეობს.

მისივე ინფორმაციით, ,,ქართული ოცნების’’ გასვლით სამუშაო შეხვედრაზე წინა მოწვევის პარლამენტის უმრავლესობის წევრები საკუთარ გამოცდილებას აცნობენ პარტიის იმ წარმომადგენლებს, ვინც პირველად შედიან პარლამენტში.

,,დღევანდელი ფორმატი არ ითვალისწინებს საკანონმდებლო ან სამთავრობო სტრუქტურებში თანამდებობების განხილვის თემას. ახალი პარლამენტარები, პარლამენტში ახლად შემოსული პარლამენტარები გარკვეულ კითხვევს სვამენ და ინფორმაცია, ანგარიში მოისმინეს ჩემგან, ეკა ბესელიასგან, ზვიად ძიძიგურისგან, იმ ხალხისგან, ვინც ეს 4 წელი გაატარა პარლამენტში, სირთულეებზე, რეალურ პერსპექტივებზე, ჩვენ ხედვებზე’’, - აცხადებს გია ვოლსკი.

ნინო ექვთიმიშვილი