სამართალი

მე ვთქვი, რომ ხომ არ მიეცეს პრეზიდენტის აქტების მომზადებაში მონაწილეობის უფლება მთავრობას - თენგიზ შარმანაშვილი

საკონსტიტუციო ცვლილებებზე მომუშავე სახელმწიფო კომისიის წევრმა თენგიზ შარმანაშვილმა განმარტა საკუთარი იდეა იმასთან დაკავშირებით, თუ რა ფორმით უნდა მიიღოს მონაწილეობა მთავრობამ პრეზიდენტის გადაწყვეტილებებში.

აღნიშნულის გაკეთება შარმანაშვილს მას შემდეგ მოუწია, რაც ახალგაზრდა იურისტთა ასოციაციის იურისტმა გიორგი გოცირიძემ განაცხადა, რომ თენგიზ შარმანაშვილი გამოვიდა იდეით, რომ პრეზიდენტის მიერ საკუთარი უფლების გამოყენების დროს, იქნება ეს პატიმრების შეწყალება, ან კანონზე ვეტოს დადება, თუ ორმაგი მოქალაქეობის მინიჭება- რომ ამ საკითხების გადაწყვეტა პრეზიდენტს მთავრობის გარეშე არ შეეძლება.

თენგიზ შარმანაშვილის განმარტებით კი, ის გულისხმობდა მხოლოდ იმას, რომ ხომ არ მიეცეს ამ აქტების მომზადებაში მონაწილეობის მიღების უფლება მთავრობასაც.

„დავაფიქსირეთ, რომ კონტრასიგნაციის შემთხვევაში მთავრობა ხდება პასუხისმგებელი ამ აქტის შესრულებაზე, ანუ პრეზიდენტზე არ არის არანაირი პასუხისმგებლობა და უფლებამოსილება, ყველაფერს აკეთებს მთავრობა. მე ვგულისხმობ, რომ ის რაც მისი განსახორციელებელი იქნება შემდგომში, ხომ არ მიეცეს ამ აქტის მომზადებაში მონაწილეობის უფლება მთავრობას. ვთავაზობ, რამდენიმე ვარიანტს. რატომღაც ეს იქნა ატაცებული, მაგრამ მერე აღმოჩნდა, რომ არასწორად იყო გაგებული, თითქოს ვინმე ითხოვდა შეწყალების ნაწილში კონტრასიგნაციას,ან ვეტოს დადების ნაწილში. ეს აბსოლუტურად არასწორია“,-აღნიშნა შარმანაშვილმა.

მონიკა დავლიანიძე