პოლიტიკა

მე ვიწყებ საქართელოს პრეზიდენტობისთვის ბრძოლას - შალვა ნათელაშვილი

ლეიბორისტული პარტიის ლიდერი საქართველოს პრეზიდენტობისთვის ბრძოლას იწყებს.

ამის შესახებ შალვა ნათელაშვილმა ბრიფინგზე განაცხადა.

„მომავალ წელს ტარდება უკანასკნელი საპრეზიდენტო არჩევნები ხალხის მონაწილეობით. ჩვენ ყველაფერი უნდა გავაკეთოთ, რათა ეს არჩევნები იყოს უკანასკნელი ბანკირ-ოლიგარქებისთვის.

ამდენად, არჩევნებამდე 10 თვით ადრე, მე ვიღებ პასუხისმგებლობას და ვაცხადებ, ჩემი ქვეყნის და მსოფლიოს გასაგონად, რომ ვიწყებ საქართველოს პრეზიდენტობისათვის ბრძოლას.

მე მზად ვარ, დავასრულო ბანკირ-ოლიგარქიული რეჟიმი, განვდევნო ისინი პოლიტიკიდან. მე მზად ვარ, დავუბრინო ხალხს დაკარგული დემოკრატია, კანონიერება, სამართლიანობა, თანასწორობა.

მე მზად ვარ, მოვუტანო უმუშევარს სამსახური, პენსიონერს ღირსეული პენსია, ახალგაზრდას განათლება, ავადმყოფს წამალი და მზად ვარ, ეს ფურცელი ისე გადავშალოთ და მოვიცილოთ ჩვენი ისტორიიდან, როგორც ეს ჩვენს დიდ წინაპრებს არაერთხელ გაუკეთებია.

ჩვენ გველოდება ძალიან დიდი და სერიოზული ბრძოლა. ყაჩაღები, მძარცველები, ბანკირები, წურბელები არაფერს ნებით არ დათმობენ. მათ ისევ ვერცხლის იმედი აქვთ. ისევ ფიქრობენ, რომ მოისყიდიან ხალხს და ამ გზით გააგრძელებენ მათ ყვლეფას.

აი აქ, ვართ იმ ხალხის, იმ პარტიის, იმ საზოგადოების წარმომადგენლები, რომელიც ვერანაირი ფულით ვერ იყიდეს და ვიმეორებ, ჩვენ გავმრავლდებით, ჩვენ გავიზრდებით და წავლეკავთ ამ რეჟიმს ერთხელ და სამუდამოდ“,- განაცხადა შალვა ნათელაშვილმა.

მონიკა დავლიანიძე