სამართალი

მე თავიდანვე ვიცოდი, რომ მართალი ვარ ცამდე - საქალაქო სასამართლომ გოგა ხაინდრავას წინააღმდეგ ეკა გიგაურის სარჩელი არ დააკმაყოფილა

საქალაქო სასამართლომ არასამთავრობო ორგანიზაცია „საერთაშორისო გამჭვირვალობა - საქართველოს“ თავმჯდომარის, ეკა გიგაურის, სარჩელი არ დააკმაყოფილა.

მოსამართლე ქეთევან კუჭავას განცხადებით, გოგა ხაინდრავას სადავო განცხადებაში არ იყო ცილისმწამებლური ელემენტები და იყო მხოლოდ შეფასება.

უშუალოდ ხაინდრავამ განაცხადა, რომ სასამართლოში მხოლოდ იმის გამო დადიოდა, რომ საზოგადოებისთვის დაენახებინა, რას წარმოადგენს გიგაური.

„ყველაზე მნიშვნელოვანია, როგორ შეაფასებს ამას საზოგადოება, რას წარმოადგენს გიგაური. მხოლოდ იმისთვის ვიყავი ამ სასამართლოში, ამ სამი წლის განმავლობაში დავდიოდი, რომ მეჩვენებენინა საზოგადოებისთვის, ვინ არიან ეს ადამიანები, რას სჩადიოდნენ და რას სჩადიან დღეს. სხვა არანაირი აზრი ჩემთვის აქ არ ჰქონდა იმიტომ, რომ მე თავიდანვე ვიცოდი, რომ მართალი ვარ ცამდე და ეს დაადასტურა სასამართლომ და ეს ვიცოდი არა მარტო მე, არამედ მთელმა საქართველომ“, - განაცხადა ხაინდრავამ.

ეკა გიგაურის ადვოკატის, თეონა ზაქარაშვილმა საქალაქო სასამართლო მიკერძოებაში დაადანაშაულა. გიგაურის ადვოკატები გადაწყვეტილების გასაჩივრებას სააპელაციოში აპირებენ, შემდეგ კი სტრასბურგის სასამართლოში.

„თავიდანვე ვაცნობიერებდით, ჩვენ არ შეგვქონდა სარჩელი დამოუკიდებელ სასამართლოში. ეს დაამტკიცა დღევანდელმა სასამართლომ და გამოიტანა ეს გადაწყვეტილება, რაც გამოიტანა. მიუხედავად ამისა, ჩვენ ავირჩიეთ სამართლებრივი გზა დავის, ჩვენ გავაგრძელებთ დავას, გავასაჩივრებთ სააპელაციო სასამართლოში“, - განაცხადა ზაქარაშვილმა.

გიგაურმა ხაინდრავას შეურაცხმყოფელი და ღირსების შემლახველი განცხადებების გამო უჩივლა. ხაინდრავამ განაცხადა, რომ 2007 წლის 7 ნოემბრის მოვლენების დროს ოპოზიციის დასაშლელად ხელისუფლებამ ეკა გიგაურის ბრძანებით სასაზღვრო პოლიციის თანამშრომლებიც გამოიყენა, რის შემდეგ ეკა გიგაურმა კაპიტნის წოდება მიიღო. სწორედ ამის გამო გიგაურმა ხაინდრავასგან ბოდიშის მოხდა და სიმბოლურად 30თეთრის გადახდა მოითხოვა