პოლიტიკა

მე მოსახლეობას ვუმარტავდი, რომ ომი დაიწყო რუსეთმა, მაგრამ მაშინდელ ხელისუფლებას შეეძლო, ამ ომში არ ჩაბმულიყო - გორის მერი

გორის მერმა კონსტანტინე თავზარაშვილმა 2008 წლის აგვისტოს ომზე გაკეთებული განცხადების განმარტებისას განაცხადა, რომ ის მოსახლეობას მხოლოდ რუსულ პროვოკაციაზე ესაუბრებოდა.

მისივე მტკიცებით, შეხვედრაზე ის ამბობდა, რომ ომი რუსეთმა დაიწყო, თუმცა საქართველოს ხელისუფლებას შეეძლო რუსული პროვოკაცია თავიდან აეცილებინა და საომარ მოქმედებებში არ ჩართულიყო.

„მე მოსახლეობას ამას ვუმარტავდი, რომ ომი დაიწყო რუსეთმა, მაგრამ იყო ისეთი პროვოკაციები რუსეთიდან გამოწვეული, რომ ჩვენს მთავრობას, მაშინდელ ხელისუფლებას შეეძლო, ეს პროვოკაციები აეცილებინა და ამ ომში არ ჩაბმულიყო, ამასთან დაკავშირებით ჩვენი უცხოელი პარტნიორებიც, გახსოვთ, ალბათ კონდოლიზა რაისი, მაშინდელი ელჩი მაილსი, აფრთხილებდნენ მიხეილ სააკაშვილს, რომ პროვოკაციები იქნებოდა და არ წამოგებოდნენ ამ პროვოკაციებს“, -თქვა გორის მერმა.

რაც შეეხება კონდოლიზა რაისზე გაკეთებულ რასისტულ კომენტარს, თავზარაშვილმა ამის გამო ბოდიში მოიხადა.

„მე ნამდვილად არ მახსოვს ასეთი რაღაცა, თუ მექანიკურად რაღაც წამომცდა, ამაზე ბოდიშს ვუხდი“, -თქვა თავზარაშვილმა.

კარალეთის დასახლებაში დევნილებთან შეხვედრაზე თავზარაშვილმა საქართველოს წინა ხელისუფლება დაადანაშაულა ცხინვალის დაბომბვაში.

აგვისტოს ომზე საუბრისას, როცა შეხვედრის ერთ-ერთმა მონაწილემ თავზარაშვილს უთხრა, რომ აშშ-ის მაშინდელმა პრეზიდენტმა ჯორჯ ბუშმა მიხეილ სააკაშვილს არწმუნებდა, არ წამოგებოდა რუსულ პროვოკაციას, გორის მერმა დაუზუსტა, რომ იმავეს აშშ-ის ყოფილი სახელმწიფო მდივანი კონდოლიზა რაისიც აკეთებდა. აღნიშნულ ვიდეოში, რომელსაც ადგილობრივი მედია ავრცელებს, თავზარაშვილი რაისს „ზანგად“ მოიხსენიებს.