პოლიტიკა

მე მეტი საქართველოს დროშის ხელში დამკავებელი არა ვარ - ავთანდილ ხურციძე რუსეთში კარიერის გაგრძელების შესაძლებლობაზე

აშშ-ში დაკავებულმა ქართველმა მოკრივემ ავთანდილ ხურციძემ სოციალურ ქსელში პოსტი გამოაქვეყნა, რომელშიც წერს, რომ თანადგომას უფრო რუსეთიდან გრძნობს, ვიდრე საქართველოდან. მისივე თქმით, თუ მას აშშ-დან გააძევებენ, ის დაფიქრდება რუსეთში კარიერის გაგრძელებაზე.

„რომ გაიგეს დიდ რუსეთში, დიდი მაფიოზები დაიჭირესო, მთელი დელეგაცია იყო მოსული, კორესპოდენტები და რა ვიცი, ვინ აღარ... აგერ, რუსეთი ჩამოვიდა სანახავად, მართლა ჩვენი მოქალაქე ხომ არააო, სამწუხაროდ, არ ვიყავი, თორემ რაღაცას იღონებდნენ. თუ ამერიკა „დამადეპორტებს“, ეს ასეც მოხდება, რუსეთში გავაგრძელებ კარიერას, მაქვს უკვე შემოთავაზებები. მაგრამ მე ჯერ მაქსიმუმს შევეცდები, რომ ამერიკაში დავრჩე. და თუ არაფერი არ გამოვა, მე მეტი საქართველოს დროშის ხელში დამკავებელი არა ვარ. მერე, რა მოხდა, კაცო, მე კი არა, როი ჯონსმა ამერიკის მოქალაქეობაზე თქვა უარი და რუსეთის მიიღო და მე რომ საქართველოს მოქალაქეობაზე უარს ვიტყვი, რა გასაკვირია.

დანაშაული ისაა, კაცი რომ ჩაიდენს დანაშაულს ან რომ ჩადის და დააკავებ. და თვითონ რომ სთავაზობ დანაშაულის ჩადენას და რამდენიმეჯერ უარით გაისტუმრებ, მერე მოხდება ერთადერთი შემთხვევა (ისიც თავდაცვის მიზნით), ჩაგიწერენ და დაელოდებიან იმ მომენტს, როდესაც მწვერვალზე ახვალ და ფეხით ჩამოგათრევენ, აი, ეს არის დანაშაული, ეს არის გეგმის განხორციელება. მთელი 3 წლის განმავლობაში ერთადერთი შემთხვევა, როცა სპეციალური აგენტები მამუშავებდნენ გვერდიდან, შიგნიდან, ზევიდან და მაინც ვერაფერი ჩამადენინეს, გარდა უმნიშვნელო მიზეზისა. 2016 წლის 10 სექტემბერს მომხდარი შემთხვევითობა გამოიყენეს 2017 წლის 6 ივნისს.

რა ვიცი, რა არ დამარქვეს ბოლოს, მეტი რომ ვერ მოიფიქრეს, „ჩაქუჩა“ კრიმინალური სახელწოდებააო და ამაზე „მსროკავდნენ“. მოწმეების მოყვანა დასჭირდა ჩემს ადვოკატებს, რომ დაემტკიცებინათ, ეს "კლიჩკა" სპორტიდანაა. საქართველოს მთავრობა არასდროს არ შეხვედრია ჩემს წარმატებას ხელგაშლილი. ამის მიზეზიც ვიცი, მე არც ერთ მთავრობას დავყვებოდი მიტინგებზე ხალხის დასარბევად და პენსიონერების საცემად. ვინც დაჰყვებოდა, ყველას რაღაც თანამდებობა უკავია. ამიტომაც ჩემი ადგილი არ გახლავთ საქართველოში. მე ერთიან საქართველოს ვუჭერ მხარს, შუაში გაყოფილს - არა. სხვას რა პასუხი უნდა გავცეთ, ერთმანეთში თანხმობა და ერთმანეთისთვის პასუხი ვერ გაგვიცია. როდის იყო ძალადობით მოსული საქმე, კარგი თუ ცუდი, კარგს მოახდენდა?! “, - დაწერა ხურციძემ „ფეისბუკის“ საკუთარ გვერდზე.

ცნობისთვის, ნიუ-იორკში 2017 წლის ივლისში 15 ქართველი დააკავეს, რომლებსაც ბრალი „რუსული კრიმინალური სინდიკატის“ წევრობაში ედებათ. მათ შორის იყო ორი ქართველი სპორტსმენი - ავთანდილ ხურციძე და ლევან მაყაშვილი. მაყაშვილი მალევე გაათავისუფლეს, ხურციძეს კი წინასწარი პატიმრობა შეუფარდეს.

2018 წლის ივნისში აშშ-ის სასამართლომ ავთანდილ ხურციძე ყველა წარდგენილ ბრალდებაში დამნაშავედ ცნო. 4 ივლისს კი, აშშ-ის სასამართლომ ქართველ მოკრივე ავთანდილ ხურციძეს სასჯელი შეუმსუბუქა.