პოლიტიკა

მე ხმა მივეცი ტატუნაშვილთან დაკავშირებულ რეზოლუციას, თუმცა ვამბობდი, რომ რამე რეალური დაგვეწერა იქ - ნუკრი ქანთარია

უმრავლესობის წევრის, ნუკრი ქანთარიას შეფასებით, არაა გასაკვირი, რომ რუსეთი არ იღებს პასუხისმგებლობას არჩილ ტატუნაშვილის ძალადობრივ მკვლელობაზე. დეპუტატის თქმით, აქედან გამომდინარე ტატუნაშვილის სიკვდილთან დაკავშირებულ რეზოლუციაში საქართველოს უფრო რეალური მოთხოვნები უნდა დაეყენებინა.

„მე მგონი, გასაკვირი არ არის, რომ რუსეთი არ აიღებს ამ საკითხზე პასუხისმგებლობას. ჩვენ შეიძლება ეს ვთქვათ, მაგრამ ასე ახლა, რომ მან აიღოს: „დიახ, დიახ ჩემი პასუხისმგებლობაა“- ბუნებრივია, რომ არ იტყვის ამას. ტყუილი კი არ ეწერა იმ რეზოლუციაში, მეც ხმა მივეცი, მაგრამ ვამბობდი კიდეც, რომ რაღაც ისეთი დავწეროთ იქ, რაც რეალური იქნება. თუნდაც მხოლოდ იმაზე რომ ყოფილიყო კონცენტრირება, რომ საგამოძიებო ჯგუფი დაუშვით იქ, რითი მოკვდა ეს კაცი, როგორ მოკვდა, რა მოუვიდა ეს. და აქ როდესაც ჩვენ ჩავწერეთ ყველაფერი, რაც კი გვაწუხებს ბუნებრივია, ისინი არ აიღებდნენ ამაზე პასუხისმგებლობას. პრემიერის განცხადებაშიც იყო ნათქვამი, რამაც რაღაცა ბიძგი მისცა ამ ყველაფერს და შეიძლებოდა ამის გაღრმავება და ფორმატის სხვა რეგისტრში აყვანას და მე მომხრე ვარ ფორმატის სხვა რეგისტრში აყვანის“, -თქვა ქანთარიამ.

ცნობისთვის, 21 მარტის პლენარულ სხდომაზე საქართველოს პარლამენტმა 106 ხმით მიიღო რეზოლუცია „რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და „ოთხოზორია-ტატუნაშვილის სიის“ შესახებ“. დოკუმენტის მიხედვით, საქართველო არჩილ ტატუნაშვილის მკვლელობაში სრულ პასუხისმგებლობას რუსეთს აკისრებს და მოითხოვს საერთაშორისო თანამეგობრობისგან, მიიღოს ზომები, რათა ქართულ მხარეს მის უცხოელ პარტნიორებთან ერთად საფუძვლიანი გამოძიების ჩატარებას უფლება მისცენ.

გარდა ამისა, აღნიშნული რეზოლუციით საქართველოს მთავრობას ევალება, 2018 წლის 15 ივნისამდე პარლამენტს წარუდგინოს ოკუპირებულ ტერიტორიაზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში ბრალდებულ და მსჯავრდებულ პირთა სია, რომელსაც „ოთხოზორია-ტატუნაშვილის“ სია ეწოდება.