სამართალი

მე გპირდები, რომ ამ პროცესზე შენ იქნები ბრალდებული და მე ვიქნები ბრალმდებელი - კობა დავითაშვილი პაატა ბურჭულაძეს

კობა დავითაშვილის განცხადებით, საქალაქო სასამართლოში მიმდინარე პროცესზე ის დაადასტურებს ფონდ „იავნანას“ დამფუძნებლის, პაატა ბურჭულაძის დანაშაულებრივ ქმედებებს.

სასამართლოში განიხილავენ ბურჭულაძის სარჩელს დავითაშვილის წინააღმდეგ. ფონდ „იავნანას“ დამფუძნებელი მას ცილისწამებაში ადანაშაულებს. საქმე ეხება განცხადებას, რომლის თანახმად, დავითაშვილი ბურჭულაძეს ფონდიდან თანხების მოპარვაში ადანაშაულებს.

„2 წლის წინ დაიწყო ფილმების სერია „პოსტ ტვ“-ში ბურჭულაძის კაი კაცობის შესახებ, თუ როგორ იყენებს ის საქველმოქმედო ფონდს იმისათვის, რომ აკეთოს ფული. სხვათა შორის, ის დღეს აგრძელებს მრავალშვილიან ოჯახებზე ფულის კეთებას და ახლა გავიგე, რომ მისთვის 25 ათასი ლარი სიმბოლური თანხა ყოფილა. ჩემს ოჯახზეც აპირებს იმავეს გაკეთებას, რაც სხვებზე გააკეთა. მე მინდა ვუპასუხო „ნაციონალების“ ბანს - პაატა ბურჭულაძე, სად იყავი 2 წლის წინ, როდესაც მამხილებელი ფილმების ეს სერია გაკეთდა შენზე. იქნებ, იმიტომ, რომ სიმართლე იყო იქ ნათქვამი ყველაფერი. მე გპირდები, რომ ამ პროცესზე შენ იქნები ბრალდებული და მე ვიქნები ბრალმდებელი. ჩვენი კოჰაბიტაციისგან „ნაცებით“ გაძეძგილ პროკურატურას თუ არ ჰყოფნის არც უნარი და არც სურვილი, ბრალდების სკამზე დასვას ბურჭულაძე , „ნაცების“ ბანს მე დავსვამ ამ საბრალდებო სკამზე და გავტკეპნი მას", - განაცხადა დავითაშვილმა.

პაატა ბურჭულაძის ადვოკატის, მარიამ ჩიქოვანის განცხადებით, ისინი ითხოვენ კობა დავითაშვილისგან, უარყოს მისი განცხადება იმის შესახებ, რომ ბურჭულაძე ფონდიდან თანხას იპარავდა, და აანაზღაუროს მორალური ზიანი 25 000 ლარის ოდენობით.