პოლიტიკა

მე და ბიძინა ივანიშვილს არ გვქონია ურთიერთობა უკვე სამი წელია - გიორგი მარგველაშვილი

საქართველოს პრეზიდენტი, გიორგი მარგველაშვილი ამბობს, რომ ყოფილ პრემიერ ბიძინა ივანიშვილთან ურთიერთობა უკვე სამი წელია, არ ჰქონია.

,,მე და ბიძინა ივანიშვილს არ გვქონია ურთიერთობა უკვე სამი წელია. ასე, რომ ბიძინას თაობაზე ნაკლებად შევძლებ კომენტარის გაკეთებას, თუ რა გეგმა აქვს ბიძინას და რა პოლიტიკურ პროცესს გეგმავს. ივანიშვილი საუბრობს ჩემზე, თუმცა ურთიერთობა გულისხმობს ორმხრივ პროცესს, როდესაც ისიც საუბრობს და მეც ვპასუხობ. შესაბამისად, ასეთი შემთხვევა ჯერ არ ყოფილა.

რეალურად, ის პოლიტიკური ველი, რომელიც ჩამოყალიბდა საქართველოში და ის ურთიერთობა, რომელიც ”ქართულ ოცნებასთან”, მთავრობასთან, პარლამენტთან მაქვს, ვფიქრობ, ივანიშვილისთვის პრობლემური არ უნდა იყოს, როგორც ”ქართული ოცნების” ლიდერისთვის და თვითონ მმართველი გუნდისთვის.

თუ დემოკრატიულობაზე და იმის ჩვენებაზეა საუბარი, რომ ყველაფერი არ იმართება ერთი ცენტრიდან, ქვეყანაში გაწონასწორებისა და ბალანსის მექანიზმები მოქმედებს, მე ვფიქრობ, ეს კარგი ილუსტრაციაა ქართული დემოკრატიული პროცესის.

ნამდვილად, მე ივანიშვილის მიერ ვიყავი დასახელებული საპრეზიდენტო კანდიდატად, აქტიურად იყო ჩართული საარჩევნო კამპანიაში და მაინც ჩვენ მივიღეთ რეალობა, როდესაც პრეზიდენტი გარკვეულ საკითხებში ეკამათება ხელისუფლებას, გარკვეულ საკითხებს ადებს ვეტოს, რაც თავისთავად გაწონასწორების და ბალანსის უზრუნველმყოფელია ქვეყანაში”, - განაცხადა გიორგი მარგველაშვილმა რუსთავი 2-ის ეთერში.

ნინო ექვთიმიშვილი