პოლიტიკა

მე ჩემს როლსა და ადგილს პარლამენტის, როგორც ინსტიტუციის, გაძლიერებაში ვხედავ - თამარ ჩუგოშვილი

პარლამენტის პირველმა ვიცე-სპიკერმა თამარ ჩუგოშვილმა უარყო ინფორმაცია, რომ ის , შესაძლოა, იუსტიციის მინისტრად დაინიშნოს.

ჩუგოშვილმა გიორგი კვირიკაშვილს მადლობა გადაუხადა გაწეული სამსახურისთვის.

„უპირველეს ყოვლისა, მინდა მადლობა გადავუხადო ბატონ გიორგი კვირიკაშვილს მის მიერ გაწეული სამსახურისთვის. ჩემთვის პატივი იყო ბოლო ორი წლის განმავლობაში მასთან მუშაობა.

რაც შეეხება ცვლილებებს, ჩემთვის მთავარია, როგორი იქნება მთავრობის ახალი შემადგენლობის ურთიერთობა პარლამენტთან. მთავრობა მეტად უნდა იყოს ანგარიშვალდებული საკანონმდებლო ორგანისთან. ბევრად უფრო დინამიური და აქტიური უნდა იყოს პრობლემურ საკითხებზე მსჯელობა ღიად, საზოგადოების თვალწინ, სწორედ საპარლამენტო პლატფორმებზე.

თუ ჩვენ შევძლებთ და შევქმნით რეალურ, პასუხისმგებლიან, საზოგადოებასთან ანგარიშვალდებულ დისკუსიას და პროცესს პარლამენტში, შედეგებიც ხელშესახები იქნება ყველა სფეროში.

მე პირადად სწორედ ამ კრიტერიუმით ვაპირებ მთავრობის ახალი შემადგენლობის შეფასებას.

რაც შეეხება გავრცელებულ ინფორმაციას ჩემთან დაკავშირებულ ცვლილებებზე, ეს სიმართლეს არ შეესაბამება. მე ჩემს როლსა და ადგილს პარლამენტის, როგორც ინსტიტუციის, გაძლიერებაში ვხედავ“, - დაწერა ჩუგოშვილმა ფეისბუკის საკუთარ გვერდზე.

ცნობისთვის, გუშინ გიორგი კვირიკაშვილმა პრემიერ-მინისტრის პოსტი დატოვა, რაც ავტომატურად ნიშნავს მთავრობის გადადგომას.