პოლიტიკა

მე ამ განცხადებებით შეურაცხყოფილი ვარ - ვახტანგ გზირიშვილის დედა

2008 წლის აგვისტოს ომის დროს დაღუპული კაპრალ ვახტანგ გზირიშვილის დედის, მარინა გზირიშვილის თქმით, მისთვის შეურაცხმყოფელია ბოლო დღეებში გაკეთებული განცხადებები, რომ ომი საქართველომ დაიწყო.

„მე პოლიტიკიდან შორს ვარ, მაგრამ არ მომწონს მათი ლოგიკა, რომ ომი საქართველომ დაიწყო. ვისთან დაიწყო ომი საქართველომ, თავის მიწაზე?! მე ამ განცხადებებით შეურაცხყოფილი ვარ. ვინ შემოვიდა ჩვენს მიწაზე, ვინ შემოიყვანა იმდენი ტანკი, როგორ დაიწყო საქართველომ ომი, ხალხო?!“, - განაცხადა მარინა გზირიშვილმა გადაცემაში „360 გრადუსი“.

მისი თქმით, მისმა ვაჟმა სკოლის დამთავრების შემდეგ თავად გადაწყვიტა შეიარაღებულ ძალებში შესულიყო.

„აგვისტოს ომი, აგერ, 10 წელია, რაც მოხდა და რაც ჩემი ვახტანგი აღარ მყავს. ათი წელი გავიდა, მაგრამ მე 13 წელია ჩემი ვახტანგი არ მინახავს, რადგან სამუშაოდ უცხოეთში ვიყავი წასული. ვახომ თავისით გადაწყვიტა, სკოლის დამთავრების შემდეგ შესულიყო შეიარაღებულ ძალებში. ვახოს სიტყვები იყო, დედა, შენ ნუ გეშინია, შენ ჩემით იამაყებო”, - აღნიშნა მარინა გზირიშვილმა.

კაპრალი ვახტანგ გზირიშვილი 2007 წლიდან მსახურობდა საქართველოს შეიარაღებული ძალების IV ქვეითი ბრიგადის 42-ე ბატალიონში მეტყვიამფრქვევედ მსახურობდა. 20 წლის ქართველი სამხედრო 2008 წლის რუსეთ-საქართველოს ომში, სოფელ ტბეთთან საბრძოლო ოპერაციის შესრულებისას, ცხინვალის რეგიონიდან დაჭრილი სამხედროების სამშვიდობოზე გადმოყვანისას, რუსული ავიაციის დაბომბვის შედეგად მძიმედ დაიჭრა და მიყენებული ჭრილობების შედეგად გარდაიცვალა.