პოლიტიკა

„მაუწყებლის შესახებ“ კანონპროექტი კორუფციის რისკებს შეიცავს - სულხან სალაძე

დღეს გახდება ცნობილი, პრეზიდენტი დაადებს თუ არა ვეტოს „მაუწყებლობის შესახებ“ კანონპროექტს.

„ახალგაზრდა იურისტთა ასოციაციის“ თავმჯდომარემ, სულხან სალაძემ ამ დოკუმენტის ამოქმედების რისკებზე ისაუბრა. მისი თქმით, კანონპროექტი დააზარალებს მედიაბაზარს, რადგან სახელმწიფო დაფინანსების მქონე საზოგადოებრივ მაუწყებელს კერძო რეკლამის განთავსების უფლება მიენიჭება, რაც კერძო მაუწყებლებს არათანაბარ პირობებში ჩააყენებს.

სულაძის თქმით, კანონპროექტში არაა მკაფიოდ ჩამოყალიბებული სტარტაპების, სპონსორობისა და შესყიდვების ნაწილი.

„ამ კანონპროექტის კანონად ქცევა აზიანებს გარკვეულწილად მედიაგარემოს. უპირველეს ყოვლისა, ვგულისხმობ სარეკლამო ბაზარს, ვინაიდან ცვლილების ერთი ნაწილი ეხება კომერციულ რეკლამას და ბუნებრივად ნიშნავს იმას, რომ სხვა კერძო მაუწყებლებს უნდა წაართვას რეკლამა, მაშინ როცა გარანტირებული დაფინანსება აქვს საზოგადოებრივ მაუწყებელს სახელწმიფოს მხრიდან. სახელმწიფო დაფინანსება 50 მილიონზე მეტი აქვს უკვე. ასევე ეს კანონპროექტი შეიცავს კორუფციის რისკებს, ვინაიდან შესყიდვების ნაწილი, სტარტაპების ნაწილი, ისევე როგორც სპონსორობის ნაწილი არ არის მკაფიოდ და ნათლად ჩამოყალიბებული კანონპროექტში“, - განაცხადა სალაძემ.

საკანონმდებლო ორგანომ აღნიშნული კანონპროექტი მესამე მოსმენით 22 დეკემბერს დაამტკიცა. „მაუწყებლობის შესახებ“ კანონპროექტს მხარი დაუჭირა 63-მა პარლამენტარმა.

ამის შემდეგ დოკუმენტი ხელმწოსაწერად პრეზიდენტს გადაეგზავნა.

საკანონმდებლო ცვლილებების მიხედვით, საზოგადოებრივი მაუწყებელი ბიუჯეტიდან დაფინანსების პარალელურად, კომერციული რეკლამის განთავსებასაც შეძლებს.