პოლიტიკა

მასკარადი ავნებს საქართველოს, მის ევროპულ არჩევანსა და სტაბილურობას - პრეზიდენტი პრემიერის გადადგომაზე

საქართველოს პრეზიდენტმა გიორგი მარგველაშვილმა პრემიერ-მინისტრ გიორგი კვირიკაშვილის გადადგომაზე კომენტირებისას მოუწოდა მმართველ გუნდს, პრემიერ-მინისტრად „ქართული ოცნების“ თავმჯდომარე ბიძინა ივანიშვილი აირჩიოს.

„მოვუწოდებ საქართველოში პასუხისმგებლიან პოლიტიკურ ძალებს, აიღონ თავის პასუხისმგებლობა საზოგადოების წინაშე, მათ შორის, მმართველ პარტიას ყველაზე მეტად და დაასახელონ პრემიერ-მინისტრად ის ადამიანი, რომელიც არის პარტიის ლიდერი, რომელთანაც მე მიმუშავია, როგორც პრემიერ-მინისტრთან მინისტრის რანგში და შემიძლია ვთქვა, რომ ჩემი გამოცდილებით, ის კარგი პრემიერ-მინისტრი იყო. მასკარადი, როდესაც ინიშნებიან ადამიანები და რეალურად გადაწყვეტილების მიმღები არის თურმე პარტია და ეს არ გამოიხატება რეალურ ცხოვრებაში, ჩემი აზრით, ავნებს საქართველოს, მის ევროპულ არჩევანს და ავნებს საქართველოს სტაბილურობას“,- განაცხადა პრეზიდენტმა კონფერენციაზე „საქართველოს ევროპული გზა“ სიტყვით გამოსვლისას.

გუშინ გიორგი კვირიკაშვილმა პრემიერ-მინისტრის პოსტი დატოვა, რაც ავტომატურად ნიშნავს მთელი მთავრობის გადადგომას.