პოლიტიკა

მასიურად აქვს ადგილი ხმის მიცემის ფარულობის დაღვევას - დავით ჯანდიერი

გაერთიანებული ოპოზიციის ერთ-ერთი წარმომადგენლის, დავით ჯანდიერის მტკიცებით, საპრეზიდენტო არჩევნების მეორე ტურში მასიურად ირღვევა ხმის მიცემის ფარულობის პრინციპი. ამის შესახებ მან დღევანდელ ბრიფინგზე განაცხადა, სადაც სხვა დარღვევებზეც ისაუბრა.

„კენჭისყრის დღე მიმდინარეობს ტოტალური დარღვევების ფონზე. მოკლედ ჩამოვთვლი ამ დარღვევებს: 1- მასიურად აქვს ადგილი ხმის მიცემის ფარულობის დაღვევას, კერძოდ, ამომრჩევლებს აიძულებენ გახსნილი ბიულეტენით გამოვიდნენ კენჭისყრის კაბინიდან. რიგ შემთხვევებში ამომრჩევლები ხმას საჯაროდ აძლევენ, მესამე პირების თვალწინ, რითაც ირღვევა ხმის მიცემის ფარულობა; 2 - გადასატანი ყუთის მეშვეობით ხმის მიცემისას კომისიის წევრების მოქმედებები ატარებს კანონსაწინააღმდეგო ხასიათს, კერძოდ, ისინი პირდაპირ მიუთითებენ, რომელი ნომერი უნდა იყოს შემოხაზული, თვითონ კეცავენ ბიულეტენს და ათავსებენ ყუთში; 3- არაერთი შემთხვევა დაფიქსირდა, როდესაც მარკირებული ადამიანი საარჩევნო უბანზე ხელმეორედ იქნა დაშვებული და ხელმეორედ მისცეს ხმის მიცემის შესაძლებლობა; 4- აღინიშნება ტენდენცია, რომ გადასატან ყუთზე რეგისტრირებული ამომრჩევლები კვლავ მიდიან უბანზე და განმეორებით აძლევენ ხმას, უმრავლეს შემთხვევაში, ისინი დაბრკოლების გარეშე ხვდებიან საარჩევნო უბანზე; 5- მასიურად აქვს ადგილი ფულის გადაცემის ფაქტებს, რაც ამომრჩევლის მოსყიდვას წარმოადგენს და ამ ფაქტებს ადგილი აქვს უშუალოდ კენჭისყრის შენობის მიმდებარედ; 6- იმისათვის რომ ამ დაღვევებზე შემდგომში შესაბამისი რეაგირება არ მოხდეს მნიშვნელოვანი და გავრცელებული დარღვევაა კომისიის წევრების მიერ აქტიური დამკვირვებლების გაძევება. ეს ტენდენცია აღინიშნება ყველა, მათ შორის ნეიტრალურ დამკვირვებლებთან მიმართებით“, - განაცხადა ჯანდიერმა.

ჯანდიერმა ცესკოსა და სამართალდამცავ ორგანოებს მოუწოდა, რომ აღნიშნულ ფაქტებზე რეაგირება მოახდინონ, რათა არჩევნების ლეგიტიმურობა კითხვის ნიშნის ქვეშ არ დადგეს.