პოლიტიკა

მაშინ მიხეილ სააკაშვილი ვა-ბანკზე წავიდა და როგორც მოსდის აზარტულ და არც ისე პასუხისმგებელ ხელმძღვანელებს, წააგო - გრიგორი კარასინი

„თბილისსა და მსოფლიოს სხვა დედაქალაქებში 2008 წლის აგვისტოს მოვლენების მაგალითზე უნდა გამოიტანონ დასკვნა აგრესიისთვის დასჯის შეუქცევადობაზე“, -ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა ТАСС-ს უთხრა.

აგვისტოს ომის მე-10 წლისთავზე საუბრისას კარასინმა თქვა, რომ თბილისი უნდა ნანობდეს თავის გადაწყვეტილებას.

„მაშინ მიხეილ სააკაშვილი ვა-ბანკზე წავიდა და როგორც მოსდის აზარტულ და არც ისე პასუხისმგებელ ხელმძღვანელებს, წააგო. სამხრეთ ოსეთზე სისხლიანი თავდასხმის შედეგად მან მიიღო ახალი რეალობა - ორი ახალგაზრდა სახელმწიფოს არსებობა, რომლებიც 2008 წლის 26 აგვისტოს ვაღიარეთ. ესაა აფხაზეთის რესპუბლიკა და სამხრეთ ოსეთის რესპუბლიკა, რომლებთანაც სამოკავშირეო ურთიერთიბებს ვავითარებთ და გავაგრძელებთ ამის კეთებას“, -აღნიშნა კარასინმა.

კარასინმა იმედი გამოთქვა, რომ „თბილისსა და არა მხოლოდ კავკასიის, არამედ მთელი მსოფლიოს დედაქალაქებში გამოიტანენ დასკვნებს სხვადასხვა აგრესიული მოქმედების შესახებ“.

„2008 წლიდან ეს , რა თქმა უნდა, არის საერთაშორისო მასშტაბის მოვლენა, რომელმაც აჩვენა, რომ ნებისმიერი აგრესია დასჯადია, ხოლო ნებისმიერი აგრესიული მოქმედებების შედეგები სრულიად ეწინააღმდეგება აგრესორის განზრახულ მიზნებს“, -თქვა კარასინმა.