პოლიტიკა

მარკო რუბიოს განცხადებით დასტურდება, რომ თანხები, რომლებიც საქართველოში USAID-ის გავლით შემოდიოდა, ძალიან ბევრ კითხვის ნიშანს აჩენს - კახა კალაძე

საქართველოში შემოსული თანხების მცირე ნაწილი მიემართებოდა სხვადასხვა პროექტის დასაფინანსებლად, რეალურად კი პოლიტიკაში, ქვეყნის შიდა პროცესების მართვის, აგრესიული ჯგუფების წახალისებისკენ მიემართებოდა, – ამის შესახებ დედაქალაქის მერმა, კახა კალაძემ აშშ-ის სახელმწიფო მდივნის, მარკო რუბიოს განცხადების შეფასებისას აღნიშნა, სადაც ის USAID-ის გაუქმებაზე საუბრობს.

როგორც კახა კალაძემ მედიასთან საუბრისას განაცხადა, მარკო რუბიოს განცხადება მეტყველებს იმაზე, რომ საქართველოში USAID-ის გავლით შემოსული თანხები კითხვის ნიშანს აჩენს.

„კითხვის ნიშანი არც უნდა დავსვათ – ეს თანხები, რომელიც საქართველოში სხვადასხვა საერთაშორისო ორგანიზაციებისგან შემოდიოდა, გამჭვირვალე იყო თუ გაუმჭვირვალე. დღეს უკვე ყველასთვის ნათელია, თუ რას ხმარდებოდა. მცირე ნაწილი მიემართებოდა სხვადასხვა პროექტის დასაფინანსებლად და ასე იფუთებოდა. რეალურად კი პოლიტიკაში, ქვეყნის შიდა პროცესების მართვის, აგრესიული ჯგუფების წახალისების, პოლარიზაციის გაღვივების, საზოგადოების გახლეჩვის დასაფინანსებლად იყო მიმართული. სწორედ ამიტომ ვსაუბრობდით გამჭვირვალობის აუცილებლობაზე, რომ როგორც სახელმწიფომ, ასევე საზოგადოებამ უნდა იცოდეს, თანხები, რომელიც ჩვენს ქვეყანაში სხვადასხვა ორგანიზაციის მეშვეობით შემოდის, რა მიმართულებით იხარჯება. რუბიოს განცხადებაც ამაზე მეტყველებს, რომ თანხები, რომელიც ამ კონკრეტულ შემთხვევაში USAID-ის გავლით შემოდიოდა, ძალიან ბევრ კითხვის ნიშანს აჩენს“, – აღნიშნა კახა კალაძემ.