პოლიტიკა

მარიამ ვალიშვილი - გაზპრომთან ხელშეკრულებაზე: ფინანსური შედეგი ზუსტად იგივე ნამდვილად არ არის

ენერგეტიკის მინისტრის მოადგილემ, მარიამ ვალიშვილმა განმარტება გააკეთა გაზპრომის ხელშეკრულებასთან დაკავშირებით.

ვალიშვილი ფიქრობს, რომ თუ ქართული მხარე არ დათანხმდებოდა რუსული კომპანიის მიერ შეთავაზებულ პირობებს, შესაძლოა, უარესი შედეგი დამდგარიყო ფინანსური თვალსაზრისით.

ამასთან, ენერგეტიკის მინისტრის მოადგილე არ უარყოფს, რომ ახალი ხელშეკრულებით ფინანსური შედეგი ქართული მხარისთვის, წინა ხელშეკრულებასთან შედარებით, წამგებიანია.

,,ფინანსური შედეგი ზუსტად იგივე ნამდვილად არ არის, თუმცა ეს არის ერთ-ერთი მაღალი ტარიფი, რომელსაც ანალოგიურ შემთხვევაში იხდიან მსოფლიოში. 10% იყო მაღალი და ძალიან კარგი იყო, რომ საქართველომ მოახერხა და წლების განმავლობაში ეს მოცემულობა ჰქონდა.

როდესაც ვლაპარაკობთ რაღაცის დათმობაზე, ჩვენ არც არაფერი გვქონია პირველი იანვრიდან, იმიტომ, რომ კონტრაქტი დასრულდა. მეორე საკითხი არის, თუ რამდენად გვქონდა ბერკეტები ისევ იმ პირობებზე დაგვეთანხმებინა რუსეთი. ეს ფორმულირება უფრო სწორი იქნება, ვიდრე ის, რომ რაღაც დავთმეთ.

გადაწყვეტილების არმიღება ნიშნავს, რომ ჩვენ არ გვექნებოდა კონტრაქტი. ეს იქნებოდა ისევ გაურკვევლობა, ისევ რაღაც ჭიდაობა და მე დარწმუნებული ვარ, რომ ალბათ კიდევ უფრო მეტი ფინანსურად ნეგატიური შედეგი დადგებოდა მომავალში. ალბათ ჩვენ ვერ ავცდებოდით ისევ სამართლებრივ დავებს, ისევე, როგორც ბევრი ქვეყანა დღეს დავობს იმ პირობების სამართლიანობაზე, რომელიც მათ ხელშეკრულების ხელმოწერით ან არმოწერით მიიღეს’’, - აცხადებს მარიამ ვალიშვილი.

ცნობისათვის: ქართული მხარე რუსეთიდან სომხეთში გაზის ტრანზიტის საფასურის გადახდის ფორმასთან დაკავშირებით „გაზპრომ ექსპორტის“ მოთხოვნას დათანხმდა. ხელშეკრულება ორწლიანია. პირველ წელს ნაწილობრივ ისევ რჩება ნედლეულით ანაზღაურების ფორმა, ხოლო შემდგომ გაგრძელდება ფულადი ანგარიშსწორება.

ნინო ექვთიმიშვილი